日本冠軍級拉麵大師林隆臣繼中環旗艦店後，今次帶埋佢於日本嘅名作黃金味噌拉麵進駐尖沙咀第二分店。講到呢個拉麵就巴閉囉，於2018年「YAHOO最強次世代拉麵決定戦味噌拉麵」奪取全國冠軍、2017年「TV松本家的休日拉麵比賽味噌拉麵」冠軍及2017年「究極拉麵関西拉麵新店舗部門」冠軍(味噌拉麵)，暫時尖沙咀店限定，而中環店就要等多排啦。
講到呢碗黃金味噌拉麵，係林隆臣大師經過長時間反覆試驗，精髓在於味噌湯底，先用高溫炒香野菜，加入味噌撞成濃湯。湯底混合咗日本各地近四十種味噌，再以免治豬肉、蒜頭、醬油、砂糖及牛奶調味，甜中帶辣，林隆臣大師拍心口打包單話：「這是在香港一定吃不到的味道。」
味噌拉麵搭配嘅秘製叉燒選用豬肩肉，經低溫焗製四小時而成，質口軟諗有肉香，而拉麵都吸滿晒湯底嘅味道。另外食嗰陣都要跟步驟㗎，先飲一啖原本嘅味噌湯，味道濃郁清甜，然後再連免治豬肉撈勻食，再添一份惹味。
見到呢個腐皮袋，好多人都以為餡料係年糕，不過原來佢係一個蔥袋！大師27歲開拉麵店嗰陣想做一個新奇嘅拉麵，所以就突發奇想創造咗個蔥袋出嚟，靈感來自日本關東煮，餡料包括蔥、薑及粉絲。
除咗味噌拉麵外，每日限定嘅雙子碗拉麵、特級白湯拉麵及海體醬油湯都值得一試！
地址: 尖沙咀棉登徑8號凱譽地下G12-G13號舖
文: Yanica
相、片: Tom Li