「唔食邊有力做運動」、「食得多應該郁吓消耗返」，呢兩個論點喺中環新開嘅肌肉主題燒肉店，完全冇抵觸㗎，皆因佢將奈良本店嘅精神帶埋嚟香港！店內設有引體上升裝置，男女食客（成人）都可以挑戰，成功完成指定次數即享免費食品，不過挑戰之前，睇吓邊款食品吸引你啦，佢嘅肉類係主打宮崎直送黑毛和牛㗎～

必試招牌

本日和牛肉盛合（$498）

餐牌上除咗牛內臟，所有牛肉都選用和牛，油香有一定質素。如果人少少又想試多幾個部位，「本日和牛肉盛合」係唔錯嘅選擇，開飯仔拍攝當日一碟就有齊牛小排、橫隔膜同里肌肉喇。

「花芯」中間嘅就係里肌肉

排喺碟中間嘅里肌肉肉味幾香，亦比牛小排有咬口，同蔥花一齊燒仲有一絲絲清甜味，食落冇咁油膩。

名物和牛混合燒（$98）

想試到牛肉唔同口感仲有另一個方法，就係點日本人氣菜式之一「名物和牛混合燒」～師傅會按當日食材，將唔同牛肉部位撈埋一碟，再加入秘製醬汁、蒜片等調味，入口有爽、軟腍等口感。想香口啲嘅話，可以翻炒至蒜片帶金黃色啊。

黑毛和牛里肌肉月見壽喜燒（$138）

可以一塊蘸月見汁，一塊原味，試晒唔同濃度

鍾意食壽喜燒嘅朋友，「黑毛和牛里肌肉月見壽喜燒」可以幫你止一止癮。雪花紋理均稱嘅牛里肌肉片浸喺壽喜燒汁，燒起後帶點甜蜜嘅焦香味道，直接食會香濃啲，蘸月見汁則口感滑，但味道相對淡咗。

和牛100%漢堡（$88）

「和牛100%漢堡」好啱食到咁上下，嗌返份做間場，因為放喺爐面上煎一份要大約20分鐘，唔怕閒置爐面呀～漢堡虧名思義用100%和牛製作，燒至微焦都仍然口感香軟，肉汁幾豐富𠻹。

人氣牛肉部位+特色食品

超厚切和牛舌（鹽）（$198）

黑毛和牛特上小排肉（$148）

牛舌同小排肉幾乎係食燒肉都會點嘅部位，呢度當然有供應啦。超厚切和牛舌大塊厚身，爽爽地又好有「肉」嘅感覺，仲意外地幾有油香。而小排肉集軟、滑、腍於一身，食落好juicy。

三星咖喱飯（$78）

以食事作結嘅話，三星咖喱飯係好有日本風味嘅選擇。秘製咖喱汁由日本總店直送香港，當中加入日本和牛同煮，和牛牛脂融化喺咖喱中，而且偏辛口味，比一般日式咖喱香濃。

自家製韓式大白菜泡菜（$48）

餐廳更有唔同小菜，解油膩感或提味都有，如自家製韓式大白菜泡菜、韓式醃腌魚內臟、季節性韓式涼拌小菜等。

凍結檸檬汽酒（$68）、威士忌可樂（$68/細）

飲品方面首推凍結檸檬汽酒，酒精濃度唔高易入口，一大排檸檬片疊高，夠晒IG-able同足料，飲到尾都仲有檸檬味。而威士忌可樂就啱想小酌一杯嘅朋友，加咗可樂都唔會好甜，同時稀釋咗威士忌嘅濃度，唔怕快醉又有feel。

焼肉ホルモンまっちゃん
地址: 中環歌賦街24號地舖

文、相：Cathy
片：Tony