念念不忘，必有迴響。「Ben Ben廚房」社交平台派飯Post 寫上嘅8隻字，簡潔有力。大埔街坊兼老闆Ben 坦言從未忘記一班為香港付出大半生嘅公公婆婆，每星期三派100個飯盒連飲品、水果畀佢哋。每逢月初，就可持65歲長者咭登記該月名額，到時到候嚟拎飯就得，唔使排隊咁辛苦，派飯都派得特別細心。

每個飯盒連飲品、水果。疫情期間更有善心人捐出口罩，互助互愛。
圖：Ben Ben廚房

登記方式派飯，老人家唔使排隊咁辛苦。
圖：Ben Ben廚房

Ben 心思細密為老人家打點，但原來性格堅定有霸氣，目標明確想做非一般大眾化餐廳。決心引入高級食材、聘請高級廚師，做出大埔少有嘅多元化餐廳。

如果你唔跟貼佢哋嘅社交平台，真係會錯過突然推出嘅龍蝦鮑魚；又估佢唔到有懷舊味十足嘅鴛鴦焗飯、燉湯，時不時熟客買咗靚海鮮嚟畀大廚即席加工都有，人情味十足。生於斯，長於斯，難怪Ben 疫情下都堅持留喺大埔開店，為一眾街坊打打氣，「大埔加油，呢幾年太多唔好嘅事，希望大埔人互助互愛。」

成日有驚喜，早前突然引入澳洲龍蝦同波士頓龍蝦。
圖：餐廳Facebook

地道Fusion，即炸軟殼蟹配港式菠蘿包。
圖：餐廳Facebook

除咗用美食為大家打氣，呢度每兩星期更為老人家提供義剪，當初點解會諗到連老人家髮型都照顧埋？「好多公公婆婆因為好多問題原因，未必肯畀錢剪髮打理。提供義剪，希望令佢地精神啲、快樂啲。」Ben 續道，「希望有能力嘅話，將來可以幫更多弱勢社群。」

公公婆婆剪個靚髮後，就可以拎埋飯返屋企食啦。
圖：Ben Ben廚房

Ben Ben 廚房
地址: 大埔南盛街16號南盛大廈地下1號舖

文：KateLuk