相信大家最近都feel到涼涼地啦，除咗要著多件衫之外，當然就更加要食個熱辣辣嘅雞煲暖暖身啦！今次開飯仔就帶大家食盡唔同特色嘅雞煲，包保一定有款啱你口味嘅！
懷舊沙嗲鍋 火水爐冰室火鍋 
雞煲就好似打邊爐，最緊要都係個鍋底！呢間餐廳主打麻辣花膠雞煲，夠晒特別，有幾可食雞煲都食得咁豪氣咁養顏吖？大大塊花膠，一啲都唔欺場，索晒啲麻辣汁係好惹味嘅。食晒啲花膠雞之後，就可以揀湯底打邊爐啦，有花生沙嗲鍋、冬蔭公鍋等特色湯底，仲有多款新鮮海鮮同靚肉！
宮廷級雞煲 淥鼎記
餐廳提供重慶麻辣雞煲，辣辣地，啱晒暖胃啦~（唔食辣記得嗌走辣），雞肉嫩滑。食完要打返個邊爐嘅，呢間有「花膠鮮雞美人鍋」，花膠軟腍，有豐富骨膠原，咁就算食完雞煲嘅罪惡感都冇咁大呀（好似係）。BTW，食雞煲前仲有多款前菜任點呢。
重慶麻辣煲 捌壹壹
想食辣辣雞煲，與其嗌大辣，不如試下食正宗重慶麻辣鍋啦！幾款選擇包括重慶麻辣雞煲、泡椒雞煲等，想食得豪氣啲仲有鮑魚雞煲同花膠雞煲。特別推介泡椒嗰款，酸酸辣辣咁，幾開胃。溫提一下，佢哋嘅辣度唔嘢少呀，即使係BB辣都好刺激。
滋潤椰子雞煲 頭啖湯
食雞煲唔一定係食辣之人嘅專利啦，呢間主打「滋潤椰子雞煲」嘅餐廳一樣咁受歡迎！奶白色嘅湯底，配上紅棗、雜菌等，記住要先飲湯後食雞呀，啲湯飲落極有椰子味，清甜而濃郁，飲多幾碗都唔會覺口渴呀！
文﹕Kiko
編：Kar
