紅館一年到晚都有好多大型演唱會舉行，呢幾晚就係克勤啦，嚟緊排住隊嘅就有張惠妹呀C AllStar呀林憶蓮呀陳柏宇草蜢側田陳曉東劉華楊千嬅……有冇搶到飛先？搶到飛固然之開心啦，但到演唱會當晚都好頭痕，8點幾開始，放工趕頭趕命咁趕過去都唔食得多，11點幾12點睇完又有啲肚餓（重點係唔想咁快散band啫），但嗰個鐘數，嗰頭附近，仲有咩好食？
芝麻蛋白燉奶 芝麻綠豆甜品屋
圖：話晒都成12點，想食嘢但又唔想食太多嘢咁heavy，明嘅，甜品啱晒。呢間係食中式甜品為主嘅，芝麻糊呀雪耳杏仁露嗰啲都唔錯，但講到招牌，一定係芝麻蛋白燉鮮奶。枱面教晒點食㗎喇，先食白色嘅燉奶，再食黑色嘅芝麻糊，兩隻味都試晒嘞，先至攪均食。咁就可以分別細嚐到蛋香同奶滑，以及芝麻嘅香濃喇。
收舖時間：02:00
同紅館距離：步行約15分鐘
榴槤雪花冰 潤一潤甜品屋
圖：另一間甜品屋，餐廳上嘅款式都幾多，好容易選擇困難症發作。食榴槤嘅可以揀榴槤雪花冰或者榴槤雪糕黑糯米，應該都會幾開心，榴槤味幾重。如果唔係，雪花冰仲可以雙拼，芒果加朱古力都係一個唔錯嘅選擇，側邊嘅toppings仲有豆腐花揀，心大心細咩都想食嘅就啱晒。又如果，一班人懶得諗，都可以叫個芒果涼粉或者鮮果撈，都幾大兜，一齊開心些牙。
收舖時間：02:00
同紅館距離：步行約13分鐘
地獄珍寶虎蝦拉麵 多喜
圖：不過有啲人，可能正餐食得真係唔多夠飽，想填下肚嘅都有介紹。呢間日式串燒小店新開冇耐，燒扇貝燒牛脷心嗰啲都幾吸引，最吸引係有大大條燒鰻魚。嫌食串燒唔夠飽嘅，可以叫多碗拉麵，雖然夜麻麻仲食辣嘢有啲刺激，仲要呢度碗地獄珍寶虎蝦拉麵都真係有返咁上下級數，我指辣度，但嗜辣者冇奶油一場嚟到唔食埋佢㗎？
收舖時間：02:00
同紅館距離：步行約17分鐘
芝士扇貝 串燒王
圖：幸福小棧
呢間串燒舖算係行得近少少，一落天橋就係，都有少少位坐下嘅，但係坐街邊，冇冷氣嘅。講返有咩食，魚腐、蒜蓉茄子、美國大生蠔、秋葵、青口、開邊燒黃金大虎蝦……全部都燒得好香，係行過都聞到香味嗰隻，連埋孜然粉調味就更加惹味，你話邪惡都係咁話。芝士控點埋芝士扇貝啦，趁熱食喎，啲芝士燒到半溶嘅狀態，滿足ed。
收舖時間：04:00
同紅館距離：步行約12分鐘
胡椒雞腳湯 新天地美食
圖：行返去尖沙咀嗰邊一樣有食神，呢間舖頭炒粉麵飯都有得食，餓底嚟就啱晒。但無論嚟到食咩都好，必點招牌胡椒雞腳湯。啲胡椒味夠晒香，老火湯又夠熱，於是熱辣辣再加胡椒辣，飲到出晒汗但就係貪佢夠辣至好飲。同埋又唔係一味得個辣字，都幾漿口，雞腳同冬菇都好腍，記得要食埋啲湯渣呀，一碗有成5、6隻雞腳㗎，好足料。
收舖時間：06:00
同紅館距離：步行約16分鐘
最後一個推介，如果你自問仲係好青春，好有活力先好去。睇完演唱會通常都會撩起唱K癮，頂得到通宵嘅咪去唱返場通K囉，最近嗰間卡啦OK行3個字就到。
文：Kar