Sanrio嘅粉絲一定知道佢哋出咗隊男團組合——Hapidanbui啦，成員包括Pochacco、Kerokerokeroppi、Ahiru No Pekkle、Bad Badtz-Maru (XO)、Hangydon(水怪)同Tuxedosam。呢隊男團最近會喺旺角同中環嘅茶飲店度駐場三個月呀，歡迎各位粉絲去探班同集郵打卡啦~

由旅遊達人袁學謙有份開設嘅實驗風茶飲店+-X茶聯乘Sanrio，將兩間分店變成Hapidanbui嘅限定主題店，有6款特飲輪流登場，仲有多個打卡位同限量精品添呀！

Kerokerokeroppi  抹茶森林探險 **

Keroppi嘅粉絲毫無懸念，抹茶紅豆拿鐵奶蓋就係為你哋而設。抹茶同紅豆呢對永遠嘅最佳拍擋拍埋一齊，從來都唔會令人失望。抹茶選用日本進口嘅宇治抹茶，甘醇茶香中滲住紅豆嘅香甜。

Bad Badtz-Maru  搞怪黑芝麻撲克迷宮##

襯返黑白嘅XO，專屬飲品當然都係以黑白色為主調。黑芝麻豆乳奶蓋帶有濃郁嘅芝麻香，面層嘅芝士奶蓋由歐洲進口嘅奶油製作，甜中帶鹹。

Pochacco  草莓豆乳城堡 **

本身都係食素嘅Pochacco，當然要設計返杯素飲品啦。呢杯豆乳沙冰豆香十足，加埋每日新鮮打嘅士多啤梨果醬，味道酸酸甜甜。杯頂放上cute cute嘅Pochacco造型乳酸味果凍，粉絲們會唔捨得咬落去嗎？

Ahiru No Pekkle  薄荷奇幻果園 ##

另一杯都有造型果凍嘅飲品係屬於AP鴨嘅，係薄荷柚子沙冰啊，大啖大啖飲有種透心涼嘅冰感，而家就到中秋都仲係咁熱，飲返杯就爽晒。

Hangyodon 藍柑衝浪樂園 ##、Tuxedosam 活力巨峰沙灘 **

呢兩杯嘅漸層色彩好鬼靚，望落有冇啲似去咗海洋同沙灘嘅感覺？水怪嗰杯係藍柑味特飲，而Tuxedosam嗰杯則係香檳巨峰葡萄茶飲。

至於聯乘精品方面，限定手提杯套一set六款，每次惠顧聯乘飲品1杯，以優惠價$36就買到1款；索繩帆布袋呢就要會員惠顧先可以有喇（優惠價$65）。

期間限定：即日起  至 12月24日
**  第一階段（即日至11月7日）先在中環店推出，之後會在旺角店供應
## 第一階段（即日至11月7日）先在旺角店推出，之後會在中環店供應

+-x茶 
中環店：永吉街20號地舖
旺角店：廣華街1號仁安大廈地下24A號舖

文、相、片：Kar