雖然好多人都鍾意掃街，但嚟緊夏天除咗會為大地帶嚟美腿，都會帶嚟汗水。喺條街度熱辣辣，掃街心情即刻大減。不過將軍澳區嘅朋友仔就唔使煩喇，有商場新開咗條食街，可以嘆住冷氣邊行邊食！成條食街有成十幾廿間舖，邊得嚟咁多quota？即刻介紹返幾間過你哋！
流心芝士雞扒 Gourmet Tasty
呢間舖有好多種小食，而且種種都好啱香港人口味，例如手抓餅呀鹽酥雞粒呀等等掃街常見小食。但講到最受歡迎嘅，都應該係流心芝士雞扒同芋圓豆花喇！雞扒大大塊，即叫即炸，外皮脆卜卜都算，中間仲要係流心嘅，睇住啲芝士湧出嚟，好治癒，仲好澎湃，食慢啲都漏呀真係，鹹鹹香香，細食少少嘅朋友食晒都飽！舖頭可以幫手剪開塊扒，方便食。而芋圓豆花嘅豆花係舖頭自家製嘅，好滑身，芋圓、紫薯圓等亦夠煙韌。
築地直送刺身 鮪世市場
初初喺食街見到壽司店，都未必會抱太大嘅期望。但呢間，確係唔錯。啲刺身全部都係由築地新鮮運到，款式多，價錢亦合理。其中有個「鮪壽司盛」，即係吞拿魚壽司拼盤好抵食下，一份有四件包括中拖羅、大拖羅等嘅壽司，厚切、鮮甜，入口亦溶化。
川貝柑桔檸檬 大哥大魚蛋
掃街當然唔少得魚蛋，呢度啲魚蛋大大粒，舖頭用新鮮魚肉自家製嘅，有煮或炸揀，一樣爽口，食得辣嘅記住要叫多咖喱汁，辣啲香口啲嘛。蘿蔔牛雜一兜有5種料，包括牛腸牛肚等，淋埋甜醬同芥末食係幾惹味，啱晒內臟怪。佢哋仲有鮮果茶系列，要數最特別嘅，係坊間好少見到嘅川貝柑桔檸檬，真材實料一片片川貝咁切落去㗎，養生得嚟又解到渴。
香檳橙香一字雞翼 豪園小食 - 炸一字雞翼專門店
呢間相信大家都唔會陌生，由美食車進化成實體舖，以鹹蛋炸一字雞翼而聞名。嚟緊，佢哋會有新口味嘅雞翼推出。香檳橙香一字雞翼用秘製香檳橙汁製成，食落酸酸甜甜，仲有機會食一到粒粒真‧橙肉添。韓風泡菜慢煮雞翼同樣都係5月會推出，酸酸辣辣咁幾開胃。
士多啤梨泡芙條 斯慕奇
舖頭主打泡芙條，有唔同嘅口味，好似士多啤梨、榴槤咁就係呢期主打嘅。泡芙條入口鬆脆，中間嘅cream又滑又甜，掃晒街之後食返個甜品，啱數呀。
創新傳統小食 小食工房
呢間小食嘅款式都幾多，而且仲好有新意，將傳統嘅小食加入新嘅配搭，例如好似碗仔翅咁就加咗黑松露落去，腸粉亦都有黑松露肉醬、芝士肉醬等味揀，嗯，黑松露醬係幾香嘅，不過開飯仔覺得腸粉都係配返甜醬麻醬嗰啲會比較夾。
羊肉卷餅 中東風味館
由中東師傅炮製嘅中東美食，當然特別地道。羊肉卷餅呀、雜錦海鮮pizza呀等等，通通都好有中東嘅風味，羊肉香羶、咖喱薄餅又夠香辣，只係行住食嘅話，有啲唔太方便啦。
文、相：Kar