成日都話將軍澳係美食沙漠，而家唔單止愈來愈多餐廳進駐，行入去海濱，最近仲新開咗間坐擁海景嘅文青風café！呢間café喺西環已經有一間，餐廳供應多款鹹點、蛋糕、咖啡及茶，有一部份範圍係gym room，亦有提供健康飲食，方便晒一眾gym友搵食啊～
餐廳裝潢以純白配木系為主，設有落地大玻璃，陽光充沛，無論係日景定夜景都咁靚，喺度chill返個下午就最嘆。
法式油封鴨脾配焦糖蘋果瑞可塔芝士酸種麵包
將鴨脾醃一晚後去皮拆肉，配埋芝士酸種麵包夾住嚟食，連埋上層嘅流心蛋真係好滿足。大廚特意加入肉桂蘋果芝士醬，令到成道菜無咁油膩。
自家製闊條麵配黑松露忌廉醬
黑松露迷一定唔可以錯過呢個意粉～闊條麵係餐廳自家製，相比坊間質地寧舍煙韌，而醬汁加入黑松露醬、忌廉及黑松露油，啖啖都係黑松露濃郁香味！
JOMO自家製素食漢堡
餐廳亦有供應素食漢堡及純素漢堡，咁素食人士嚟到都唔怕無嘢食啦～漢堡肉用麵包糠、紅腰豆及雞心豆打成，像真度極高，一啲都唔似食緊素肉。而呢個眼似芝士嘅醬汁其實係一個有腰果成份嘅健康醬汁嚟㗎。
更多【新店直擊】： |
西班牙黑毛豬叉燒定食
選用最頂級西班牙黑毛豬，呢隻黑毛豬係食純橡果長大，肉質比較腍身，食落口真係有橡果嘅味道～而飯就用咗珍珠米配日本蛋黃，加埋初柞橄欖油，健康又好味。
戚風蛋糕(柚子)
柚子係將軍澳店先有嘅味道，選用日本高知縣柚子皮，因為將柚子皮煮成蓉，所以唔會有苦澀味，加上奶油令成個蛋糕更濕潤。
沖繩黑糖濃縮咖啡梳打、薰衣草伯爵茶
呢個沖繩黑糖濃縮咖啡梳打夠晒特別，加入沖繩黑糖及檸檬配咖啡，味道甜、酸及苦，感覺有啲似飲緊有味咖啡，但味道又相對清新咁～如果唔想飲咖啡，亦可以試試薰衣草伯爵茶，一樣值得一試！
地址: 將軍澳唐俊街23號澳南海岸MONTEREY PLACE地下G01號舖
文、相、片: Yanica