蛋卷可以話係香港經典嘅小食，通常過時過節就會用嚟做送禮。尖沙咀最近開咗間餅店，專賣傳統餅食，蛋卷仲有成12款口味咁多，就連諗都冇諗過嘅櫻花蝦、香蔥紫菜味都有，而且師傅仲大有來頭添，係由前半島酒店嘅師傅主理啊。

 (左)葉永華師傅、(右)黎永冠師傅

葉永華師傅入行50年，佢嘅徒弟黎永冠師傅亦都做咗超過40年，經驗老到，今次兩師徒合作，兩人表示「我哋將舊式嘅食品重新包裝、重新改良，希望可以做到有營養，同埋畀多啲人接受，譬如送禮。重新將古老嘅嘢傳承落去。」

舖頭主打嘅蛋卷總共有12款口味，全部都係蜂巢蛋卷嚟，色澤金黃，比一般長長嘅圓筒形的式，大約係三分一嘅SIZE，三兩啖就可以食得完一條，蛋香同牛油香都好濃郁，口感相當鬆脆，但脆得嚟又唔會散，即使咬到最後一啖，都唔會碎開！師傅仲話佢哋嘅蛋卷主張全天然，冇加任何添加劑或防腐劑等。而且，係經過反覆試驗同調整配方超過50次先至成功㗎 。

12款口味蛋卷分咗幾個包裝：

 經典蛋卷禮盒：原味、皇金(鹹蛋)、椰汁、薑汁

 休閒蛋卷禮盒：原味、岩鹽朱古力、咖啡、伯爵茶

 奇趣蛋卷禮盒：原味、香草蕃茄、黑松露、櫻花蝦

 特別口味：香蔥紫菜、榴槤

每隻口味都各有特色，有啲鹹香，有啲茶香，有啲就清香，而最推介嘅就係櫻花蝦味喇！師傅嚴選咗兩款櫻花蝦，大啲嗰款就研磨後加入蛋糕，細啲嗰款仲放喺蛋卷面，細心望真係見到一粒粒蝦毛仔㗎，而且食落有鹹鮮味之餘，仲有脆脆der口感，好有活力。

黎師傅表示構思都係嚟自生活同經驗，過往佢曾經喺唔同地方工作過，「我跑嘅地方比較多，馬來西亞呀、泰國呀啲地方有好多觀念，比如我每日都鍾意飲杯咖啡先返工嘅，咁我一直咁諗，我可唔可以將我鍾意飲嘅咖啡混入喺蛋卷裡呢？我就用意大利最靚嘅咖啡豆，將精華滲入蛋卷。」所以咖啡味嗰隻，有醇厚嘅咖啡香同微甘，咖啡控要試啊。

除咗蛋卷之外，舖頭仲有其他傳統餅食，包括外脆內酥兼牛油味香味嘅蝴蝶酥、口感香脆嘅酥餅、口感豐富嘅酥條同充滿驚喜嘅曲奇。

 蝴蝶酥系列：原味、芝麻味

 酥餅系列：皇金酥、芝麻酥

 酥條系列：杏仁、五穀籽

 曲奇系列：牛油、開心果、朱古力杏仁、蜜餞薑粒

皇玥餅藝
地址：尖沙咀加連威老道43號地舖

文：Kar
相、片：Tom Li