酒鬼可能好耐都冇落過bar 飲返兩杯chill返下了，尖東海傍有間兩層高嘅酒吧最近開返業喇。餐廳以20世紀嘅阿根廷傳統草藥同植物做主題，有個收藏咗過百款草藥嘅百子櫃，cocktails杯杯都充滿特色。座位方面，既有室外露天用餐平台，亦有樓上海景露台，感覺就是relax。

 樓上露台

 牛油果炸粟米片

食物當然有南美風味，仲好啱送酒添。好似牛油果炸粟米片咁，仲有多款酸菜配搭，粟米片厚厚der，脆口得嚟味道亦多層次。

 八爪魚配阿根廷青醬

八爪魚配阿根廷青醬作為前菜亦恰如其分，成條八爪魚腳粗壯但軟腍，陣陣鹹香。仲有軟滑嘅豆泥蓉墊底，都咪話唔飽。

 牛肉漢堡配豬肉腸、芝士及紅捲生菜

飲酒前想食飽肚少少，牛肉漢堡配豬肉腸、芝士及紅捲生菜幾啱數，仲有埋薯條，襯咗。牛肉漢堡啖啖juicy肉汁，半溶嘅芝士都係重點，放開儀態大啖大啖咁食先有feel。

 Smoke Bomb

嚟到重點當然係要試下佢哋嘅cocktails啦，視覺效果最豐富嘅一定係Smoke Bomb，各位打卡粉記得要準備好手機/相機，呢款以Diplomatico Planas冧酒，混合菠蘿、杏仁、雪利酒、新鮮青檸汁、可可同苦酒等調製嘅雞尾酒，調好後仲會喺酒面輕輕放上煙燻泡沫球，又夢幻又fancy。泡沫球爆破後會有陣陣煙燻香味傳出，飲落果味香甜，好啱女生口味。

幾個朋友一齊去happy嘅，揀Tropical Cure Punch就最啱。可以選擇2-6人份量，成個高身酒壺上枱，夠晒型格。打完卡之後可以自己隨便斟，邊個想要大杯啲，邊個細細杯淺嚐幾啖就得都冇問題。呢款賓治酒，同樣以Diplomatico Planas冧酒為基調，加入牙買加冧酒、西柚等調製，同樣滿滿果香，適合大眾口味。

 Crazy in the Coconut(左)、Brave Bullfighter(右)

成個椰子咁上嘅Crazy in the Coconut又係打卡熱選，感覺仲有啲東南亞風情添。以椰子為主調，混合伏特加、椰子忌廉、奇異果甜烈酒同新鮮青檸汁等調製，口感柔滑，微微甜香。如果稍為喜歡烈酒嘅朋友，可以試下Brave Bullfighter。以牛角形狀嘅玻璃杯盛載，橙紅色嘅酒體相當吸睛。調酒師以香菇浸泡伏特加、混入龍舌蘭、Peddlers Rare Eastern手工氈酒、苦酒同青檸汁等，既有陣陣植物幽香，亦有微微辛感。

Boticario Bar and Grill
地址：尖沙咀麼地道66號尖沙咀中心地下5號舖及UG樓15號舖

文、相、片：Kar