尖沙咀呢間甜品店之前幾乎每日都係大排長龍，唔少人為嘅就係一試空氣感十足嘅梳乎厘班戟。經過暫停休業進行改裝工程後，最近已經重開，唔單止空間更大，Menu亦增加選擇，包括宇治抹茶Soufflé Pancake，同全新嘅芭菲，各位甜魔準備好去試未？
PAN de PAIN Pancakes & Sweets尖沙咀經過改裝，租埋隔離舖位，地方更大亦增加咗約30個座位，唔使再驚排隊要排好耐啦。招牌Soufflé Pancake就當然繼續供應，仲多咗芭菲揀呀。
Uji Matcha Soufflé（$95）（12:00後供應）
招牌Soufflé Pancake新增宇治抹茶口味！由忌廉、醬汁、雪糕都使用日本宇治抹茶，各有唔同風味：淋醬用抹茶加北海道牛奶等製作，甜度低更容易品嘗到抹茶回甘；上面嘅抹茶忌廉就混合咗Mascarpone Cheese，口感較厚身甜度適中；Mochi嘅抹茶香最突出回甘亦最明顯，口感軟彈。北海道紅豆亦係另一亮點，保留部分粒粒口感，味道濃郁香甜。
Hokkaido 8.0 Milk Strawberry Custard Parfait（$78）
全新嘅芭菲系列就有兩款口味，同樣都有奶香濃郁北海道8.0牛奶雪糕！呢款就以士多啤梨為主，有士多啤梨醬汁、吉士、忌廉、蛋糕粒粒、Crumble，唔單止賣相層次分明，口感同味道亦相當豐富！最加分嘅係自家製士多啤梨醬汁，保留少少士多啤梨果肉，甜度自然又有咬口。
Hokkaido 8.0 Milk Caramelised Banana Chocolate Parfait（$78）
另一款就以朱古力為主，配即燒焦糖香蕉！一層層係法國70%朱古力慕斯、忌廉、朱古力海綿蛋糕、可可脆米、士多啤梨醬汁、朱古力醬等。香蕉嘅焦糖面口感薄脆、帶少少焦糖苦味，係一大亮點。記得盡量挖深啲，口感層次先會更豐富。餐廳希望之後會推出更多芭菲口味，好似唔同季節嘅時令水果，可以密切期待！
更多【飲食潮流】： |
Hojicha Latte（熱$52，凍$56）
飲品亦新增焙茶Latte，選用宇治焙茶，香氣突出口感柔滑。而且所有用到牛奶嘅飲品，全部由明治牛奶改為100%北海道函館3.7鮮牛乳，奶香更濃郁！
PAN de PAIN Pancakes & Sweets
地址：尖沙咀河內道18號K11購物藝術館B1樓B111B及B111C號舖
文、相、片：Cathy