尖沙咀新開高CP值鐵板燒日本主廚坐鎮注重細節海鮮鮮上加鮮

香港大約有百幾間鐵板燒餐廳，但由日藉主廚坐鎮嘅，就寥寥可數。要知道日本人一向認真、嚴謹，注重細節，由日本人做廚嘅餐廳，對食材嘅處理同搭配都一定相當有要求。尖沙咀最近就有間新開嘅鐵板燒餐廳，專誠由日本請到有超過33年經驗嘅鐵板燒師傅，永嶋浩司嚟做主廚，食物質素有保證之餘，CP值都幾高呢。

　日藉主廚永嶋浩司

餐廳裝潢以石系同木系為主題，入到去有種自然放鬆同舒服嘅感覺，客人可以選擇坐喺L形鐵板檯旁，近距離欣賞師傅嘅手勢。食材大部分來自日本，並各自有多款唔同嘅自家調製醬汁配搭，突顯食材嘅鮮味，特別令到幾道海鮮菜式鮮上加鮮。

　鐵板燒北海道帶子

　香辣大蝦沙律　　

好似鐵板燒北海道帶子咁，加入牛油、蜆汁同檸檬汁等調味，仲有菠菜墊底，外層燒至微微焦香，入口啖啖鮮甜，連埋菠菜一齊食，口感更見豐富。而師傅亦特別為香辣大蝦沙律調製咗柚子醋汁同香辣汁，煎香嘅大蝦放上沙律面，一方面酸辣鮮爽，一方面又有種小清新，味道有層次。

（左）兵庫縣生蠔、（右）茶碗蒸

日本人主張不時不食，師傅會根據時令挑選唔同產地嘅生蠔，開飯仔採訪當日用嘅係兵庫縣生蠔，最大嘅特點就係比一般生蠔嘅甜味更突出，配埋自家調味嘅酸汁，味道鮮甜爽脆。另外，千祈唔好睇輕呢碗茶碗蒸，用上鰹魚湯汁製作，食落特別清甜，配料方面亦較食開嘅豐富，連魚刺同三文魚子都有！

（左）深海野生白鱈魚、（右）帝王虎蝦

主食方面亦有唔同嘅選擇，深海野生白鱈魚煎至金黃微焦，肉質實淨爽滑，醬汁清甜帶鹹香；帝王虎蝦則爽口彈牙，蝦頭重有唔少甘甜嘅蝦膏𠻹，相信必定能滿足到一眾海鮮控。

美國安格斯牛柳

紐西蘭羊架

師傅對細節嘅執著，亦可以喺佢處理肉類方面見到。特意喺日本訂造特長煎鏟，不論係牛柳定羊架，煎香後都會先做resting，務求鎖緊返啲肉汁先至上菜。美國安格斯牛柳肉香滿滿，建議夾埋脆卜卜嘅蒜片一齊食會更香口；紐西蘭羊架帶有微微羶香，軟腍juicy。

蒜香炒飯

雖然可能已經食到好飽，但接近尾聲登場嘅炒飯都係精髓，尤其係塊飯焦，薄脆得嚟又有少少煙韌感！日本人崇尚簡約，材料方面無需太花巧，秉乘傳統，簡簡單單用雞蛋、香蔥，加上蒜頭或櫻花蝦，已經炒出一碗香噴噴、飯粒乾身分明嘅蒜香炒飯或櫻花蝦炒飯。

BTW，鐵板餐有唔同價位嘅選擇，各自包有前菜、肉食同海鮮等，而家經OpenRice網上訂座嘅話更可享有$498開業優惠價，優惠期至到7月底咋留意返。

三日月
地址: 尖沙咀金馬倫道23號金馬倫廣場2樓B號舖

文、相：Kar