喺何文田小有名氣嘅台式飲品店丸茶手作最近去到尖沙咀插旗開分店。新店位置更加方便之外，亦新增幾款口味嘅珍珠，最新嘅有粉色系櫻花珍珠，另外亦新出兩款鹹食，用嚟做午餐就最啱！

新店所用嘅奶茶底同以往嘅不同，以前用嘅係著重茶香嘅錫蘭奶茶，而新店就轉咗用台灣古早味奶茶，飲落更多一份咖啡香。

至於有乜新出珍珠呢？首先介紹番呢款──只係推出咗幾日嘅櫻花珍珠。先用熱水將特別訂造嘅櫻花粉圓粉搓成粉糰狀，搓至均勻後就放入珍珠機。

珍珠機會壓平粉糰，再切割出粒粒珍珠，粉紅櫻花珍珠就咁誕生啦！

但工序未完架，師傅仲要用至少1個鐘頭將櫻花珍珠煮至煙韌，即係台灣人講嘅「Q彈」，功夫絕對不可馬虎！除咗櫻花珍珠，同樣新出嘅仲有黑芝麻珍珠、芒果寒天珍珠及手作雞蛋布丁。

呢杯薰衣草奶綠連桂花珍珠($28)，配搭感覺新穎。通常用薰衣草製作花茶會比較多，但居然放喺手調飲品之中，都幾有創意。飲品用台灣奶粉、糖、冰等調配而成，重點就係面層嘅桂花珍珠，係客人經常柯打嘅人氣珍珠嚟架！

薰衣草好香，但飲品飲起嚟就好有桂花嘅清香，令整杯飲品都好有花茶感。而且桂花珍珠帶少少微甜，口感亦夠煙韌，分量亦都幾多，好有嚼頭。

至於另一杯芋頭拿鐵($26)，亦令開飯仔感到驚喜。芋頭分量至少佔飲品杯嘅3分之一，所以每啖都會食到又香又軟糯嘅芋頭，好吸引。

而呢一杯黑糖珍珠撞奶($28)，可以話係舖頭人氣Top 3。雖然間間台式飲品店都會有珍珠奶茶，但做得好飲、珍珠又好食嘅其實不多。

開飯仔就好鍾意呢度嘅黑糖珍珠，珍珠好有黑糖香，但飲落無非常死甜，甜而不膩；珍珠煙韌得嚟仲會有少少彈牙感，比起一般嘅珍珠有嚼頭。而且，黑糖珍珠一直會以保溫鍋保存，所以珍珠食落依家溫暖煙韌，而唔會有種「硬化」嘅嘅感覺。

首次推出台灣味鹹食！

鹹食方面，店子推出府城滷肉飯($29)及太山梅仔雞湯飯($38)。店子所用嘅滷肉飯食譜係由台灣人老闆Henry由細食到大嘅台式味道。

先將肥瘦不一嘅豬腩肉用豬油炒香，再以台灣豉油、米酒等配方製成滷汁，並熬煮至少1小時，令滷肉完全入味。

一般滷肉飯味道偏甜，但呢碗滷肉飯味道都幾有層次，先鹹後甜。一入口先感受到滷肉嘅鹹香，然後再慢慢滲出滷汁嘅甜味。

除咗滷肉，仲有滷蛋及酸瓜添，好豐富！

另一款較為少見嘅太山梅仔雞湯飯，嚴選台灣南部梅嶺太山梅子，加埋本地雞肉、椰菜、薑一同燉煮雞湯半個鐘，煮得越耐，梅子嘅酸味越突出。

飯就用咗口感煙韌嘅珍珠米，而雞肉喺燉煮之前用台灣黑麻油炒香，整個湯飯都有濃濃嘅麻油香，好有台灣菜特色。

湯水味道帶點微酸，都幾清新開胃，略嫌少許過油。另外，除非係即食，舖頭多數都會將飯湯分開裝，好貼心。

丸茶手作
地址: 尖沙咀加連威老道地下60A號舖

文：Joy