日式梳乎厘班戟熱潮似乎仲未減退，呢間以價錢取勝嘅梳乎厘班戟店喺旺角白布街嘅分店每日依然有唔少人排隊，其實佢地最近已經進駐銅鑼灣開分店！雖然定價調高咗，但唔單止有枱櫈畀大家坐低食，而且仲增加咗唔少創新梳乎厘班戟口味。
 

I Love You Dessert Bar今次嚟到銅鑼灣希雲街開店，一口氣推出八款梳乎厘班戟新口味，當中配搭最新穎嘅就要數到呢碟「麻油蛋糕，開心果忌廉綠茶雪糕配綠茶梳乎厘班戟」。係咪無諗過麻油同抹茶呢個配搭呢？麻油蛋糕聞落有濃郁麻油香，但食落其實味道唔重，鬆軟帶少少鹹香。
 

而綠茶梳乎厘班戟就採用日本宇治抹茶，入口即溶喺口腔留低少少抹茶餘韻。配埋麻油蛋糕係意料之外地夾嘅組合！配埋自家製宇治抹茶雪糕同意大利開心果醬，味道豐富又有新鮮感。
 

另一得意配搭係「蓮蓉馬卡龍，流心奶皇梳乎厘班戟配豆腐雪糕」，蓮蓉加奶皇呢個組合真係好有中秋感覺呀。梳乎厘班戟流心效果唔錯，奶皇餡亦食到一粒粒蛋黃粒。師傅仲表示奶皇餡特別參考咗酒店嘅奶皇月餅配方㗎。
 

奶皇梳乎厘班戟同蓮蓉馬卡龍都比較甜，所以配返豆腐雪糕同手打日本忌廉就平衡返啲。而中間一粒粒嘅係加脫水牛油炒過嘅牛奶粉，有奶香又唔會覺得太膩，配奶皇梳乎厘班戟又係另一種甜美。
 

「忌廉芝士梳乎厘班戟」落足料，外面睇啲Cream Cheese醬已經多到好似迷你瀑布咁，兩層梳乎厘班戟中間其實仲有一層Cream Cheese醬㗎。表面輕輕燒過令芝士香味更加濃郁，不過食落就無想象中咁有芝士鹹香，都係以班戟甜味主導多啲。而且本身梳乎厘班戟質地已經偏濕，加埋Cream Cheese醬就更加難以用叉切開。
 

而旺角店賣開嘅拿破崙班戟呢度一樣有，「拿破崙榛子吉士班戟」嘅拿破崙皮非常酥脆，切開嘅時候會聽到清脆嘅聲，可以媲美酒店出品。中間夾嘅榛子醬亦非常濃郁香滑，相比起嚟中間塊班戟就無乜特點喇，而且唔好睇佢好似細細份咁，因為甜度高嘅關係食完都幾飽肚。
 

食咗咁多甜品不如嗌返杯飲品吖，特飲同樣係銅鑼灣店限定。「泰國菠蘿仔梳打」相當搶鏡，唔單止有足半個脆口泰國菠蘿仔，而且特別用咗迷你魚缸裝住杯梳打，旁邊仲有部釣魚機畀大家邊飲邊玩，成個Package係過癮嘅。
 

開飯仔同師傅傾咗一陣，先知道原來師傅有八年酒店甜品師經驗，難怪用嘅食材都係酒店級。而且預告定銅鑼灣分新店操作穩定之後，有機會推出鹹食班戟！各位甜魔就可以拉埋你身邊唔食甜嘅朋友仔一齊嚟試啦。

I Love You Dessert Bar
銅鑼灣希雲街28號希雲大廈地下30號舖

文、相、片：Cathy