日本人氣甜品幸福Pancake終於喺呢個星期五，登陸銅鑼灣利園三期開香港首店！日本各地分店經常大排長龍，靠嘅就係4cm厚、充滿空氣感嘅鬆軟幸福班戟。銅鑼灣店沿用優質食材，開幕頭兩個禮拜仲可以食到原本係京都限定嘅抹茶班戟配黑糖漿，各位甜魔係時候去潮聖啦！
 

幸福Pancake首店喺日本大阪，而銅鑼灣店係品牌第一間海外分店！每份班戟都係即叫即製，所以要等約20分鐘，大家可以隔住玻璃睇到廚房裡面嘅製作過程。品牌標榜唔落泡打粉，而係用獨家天然方法令班戟香軟鬆化。例如即打蛋白霜、經常檢查烤盤溫度、控制班戟喺4cm高等等。日本主廚直至7/10亦會喺銅鑼灣店幫手控制出品品質。
 

幸福班戟（$108）

幸福班戟唔單止最容易畀大家試到班戟原味，亦係品牌用料嚴謹嘅好例子：班戟選用優質小麥粉同日本產地直送到港嘅雞蛋，上面球狀嘅唔係雪糕而係蜂蜜牛油，而呢個蜂蜜牛油用嘅係紐西蘭最高級嘅麥蘆卡蜂蜜，同北海道鮮奶製成嘅發酵牛油！
 

食落班戟的確充滿空氣感，蓬鬆得嚟又唔會完全入口即融，輕盈微甜富蛋香。蜂蜜牛油有蜜糖天然甜香而唔太膩，可以按自己口味再添加焦糖漿。
 

（期間限定）有機抹茶小倉牛油班戟配黑糖漿（$138）

知道香港有唔少抹茶控，銅鑼灣新店開張首兩週（28/9-11/10）期間限定，將京都店限定嘅抹茶口味帶嚟香港！
 

班戟加入日本抹茶粉，食落帶淡淡茶香，死忠抹茶控如果要追求鮮味同回甘就可能會失望啦。勝在食落甜而不膩，配紅豆牛油忌廉同黑糖漿相當有和風感。
 

 

熱朱古力班戟配自家製榖麥（$118）

常設甜班戟總共有六款，包括呢碟熱朱古力班戟，班戟淋上熱朱古力，再加忌廉同自家製榖麥。食落又無想象中咁甜，因為朱古力唔會過甜，朱古力香濃厚而唔會蓋過班戟蛋香。忌廉富牛奶香，柔滑清爽。加上自家製榖麥增加香脆口感，無論味道同口感層次都相當豐富。
 

三文魚牛油果芝士慕絲班戟（$138）

另外仲有四款鹹班戟，係改用全麥麵粉製作嘅班戟，食落唔甜，帶小麥顆粒口感。最豐富嘅就係呢碟三文魚牛油果芝士慕絲班戟，三文魚嘅脂香、牛油果嘅Creamy，同芝士慕絲嘅香滑各自同有小麥香嘅班戟好夾。
 

有機排毒美顏茶（單點$48，點班戟加$28）

食班戟仲可以配返杯咖啡或者熱茶，呢壺花草茶就有薄荷、牛蒡、蒲公英根、羅勒同紅花苜蓿。無咖啡因，以薄荷茶清涼味道為主。
 

銅鑼灣店佔地約1,500平方尺，室內戶外都有座位。甜班戟都可以加$15加雲呢拿雪糕或鮮忌廉，而店裡面會有果味水同清水可以自取。店方表示雖然暫時未有香港限定口味，但唔排除好似日本店咁，不定期推出季節或期間限定口味嘅班戟！各位準備好呢個星期五迎接呢份幸福Pancake未？
 

幸せのパンケーキ（A Happy Pancake）
銅鑼灣新寧道1號利園三期2樓203-205號舖
*2018年9月28日早上11:30開幕

文、相、片：Cathy