人稱廚魔嘅香港名廚Alvin Leung（梁經倫），餐廳Bo Innovation自2009年已經開始每年穩奪米芝蓮二星，2014年開始仲升上三星，一直拎到最新2018年版。本身做開新派份子料理，今次新餐廳鴨大哥竟然做港式粵菜？即刻同Alvin了解吓先。
Alvin話今次係第一次正式開設粵菜館。雖然佢喺英國及加拿大生活，但屋企都係食中菜為主。而用北京填鴨做主打因為鍾意食烤鴨，自己亦一直都有研究。為咗做出一隻出色嘅烤鴨，鴨品種、大小、做法、烤製時間、溫度等等都試過好多次，突出鴨原有鮮味。
餐廳供應兩款北京填鴨，選用3公斤美國種北京鴨，肉質特別鬆化，來貨後要熟成兩個星期。用來做aging櫃底部有鹽，用來收乾水份，肉質會變得更加軟嫩，肉味亦更濃。
慢煮烤鴨要用烤爐煮，以60多度烤煮接近3小時，再放入高溫烤爐半小時，令鴨皮更香脆。厚切鴨肉食落腍身好滑，配上京葱、哈蜜瓜、蘿蔔等配料同橙果醬，用橙味蝴蝶包夾住，靈感源自法國名菜Duck a L’orange。因為工序多，一日只限晚市供應，限量10隻架咋！
慢烤原隻燒鴨 $588（約有12片）
傳統烤鴨做法直接放入澳洲訂造嘅高溫磚爐烤40分鐘，比起一般做法更短時間，肉質保持嫩滑。用薄餅包住皮連肉，肉較薄身，醬汁有蒜頭、海鮮醬等，味道較濃郁。
北京烤鴨 $428/每隻，$228/半隻
餐廳亦有唔少鴨菜式，炒鴨鬆有五款，包括港式、法式、印式、韓式等。法式鴨鬆用紅酒加砵酒製作，再加一片鴨肝。印式就加入大量小茴香。
法式炒鴨鬆 $188、印式炒鴨鬆 $98
粵菜菜式同點心都加咗創意元素，好似雪菜鴨絲芋角、羅勒鴨絲春卷都加入鴨肉製作，亦有用鴨架製作海鮮湯泡飯等，鍾意食鴨嘅朋友實好滿足。
羅勒鴨絲春卷 $42、雪菜鴨絲芋角 $36
荔枝山楂咕嚕肉 $138、牛油鮑魚 $168/隻
地址：銅鑼灣勿地臣街1號時代廣場10樓1001B號舖
文、相、片：Perrins