喺香港想食漢堡有好多選擇，唔一定次次都要去連鎖店，不如多啲支持一下本地創作。好似灣仔呢間新開嘅小店就好有諗頭，以生菜包為靈感設計咗一款泰式漢堡！牛肉漢堡亦特別用咗本地同美國三個唔同部位嘅牛肉手打成漢堡扒，落足心機㗎。
 

MAD Burger主打手工漢堡，亦有供應意粉、沙律、咖啡等。半開放式廚房可以畀大家見到製作過程，感覺安心啲又可以增加同廚師嘅互動。漢堡暫時有三款選擇。
 

Right Mad（$78）

漢堡扒食落柔軟多汁有牛香，原來係用咗本地牛腩、牛小排，同美國嘅牛肩胛三款牛肉打成，各自取其油脂香、瘦肉口感同牛肉香，難怪食落口感同味道都啱啱好，香而唔膩。而包就選用法式牛油麵包，就咁食已經有淡淡牛油香，口感鬆軟。
 

配料方面有生菜、蕃茄、車打芝士、焦糖洋蔥、同Mad Sauce。車打芝士用火槍燒至半融，而Mad Sauce係用燒烤醬、蛋黃醬等同自家秘方調配嘅醬汁，酸酸甜甜咁，加埋蔬菜可以平衡膩感。碟邊仲有酸黃瓜，方便返唔食酸黃瓜嘅朋友仔吖嘛。
 

Thai Mad（$78）

係泰式同西式Fusion，豬肉碎加辣椒絲、金不換、檸檬葉、魚露等炒香，放入生菜成為漢堡主角，配搭煎蛋、艾民頓芝士、蕃茄。食落香料香味突出，味道微辣，爽脆嘅生菜、帶酸嘅蕃茄同蛋黃半熟嘅煎蛋就可以增加口感層次，亦令漢堡整體味道平衡。
 

Veggie Mad（$78），Potato fries（$38，漢堡+$20）

另外亦有「走肉」版本嘅漢堡，材料有薑黃蘑菇、生菜、蕃茄、牛油果、艾民頓芝士、焦糖洋蔥，同樣配以酸黃瓜。其他蔬果味道都比較輕，蘑菇就特別加入Super Food薑黃粉炒香，增添風味。軟滑嘅艾民頓芝士同香甜嘅焦糖洋蔥亦好夾。

另一個心機位喺薯條度，選用薯仔味較濃嘅黃皮薯仔，連皮切完之後要浸冰水，洗走表面多餘澱粉，先焗至軟身，再喺收到Order之後立即油炸，就做到外脆內軟嘅口感喇。
 

Pastas of the day（$88）

意粉每個月都會更換款式，新開張係呢款香蒜辣椒魷魚意大利麵，係經典蒜片辣椒意粉嘅變奏，加入蕃茄同魷魚，最後撒上巴馬臣芝士碎。味道酸酸辣辣，而且魷魚食落充滿鮮味又彈牙，非常醒胃。
 

Dirty（$38）

咖啡採用選用本地烘焙品牌咖啡焢嘅Season Blend咖啡豆，而Dirty即係熱嘅Espresso撞凍牛奶，唔加冰亦唔使搞勻，可以同時品嘗到熱同凍兩款口感，當中以凍咖啡嘅朱古力香較為突出，味道香醇口感柔滑。
 

（右）Lime Mad（$38）

而Lime Mad係香茅青檸梳打，用自家製香茅糖水加新鮮青檸片同梳打水，氣泡口感加上青檸酸味非常清爽。
 

MAD Burger
地址：灣仔灣仔道181A-181G號長春大廈地下A號舖

文：Cathy
相、片：Tom Li