暫時飛唔到去泰國，喺香港食住泰國菜先吖。好似旺角呢間新店就有曼谷拉差達火車夜市熱賣嘅火山排骨！將排骨疊高再淋上秘製酸辣醬汁，好惹味！另外仲有唔少創意菜式，富泰國風味又有特色。
 

精選拼盤（$148）

Bamboo Thai主打以現代烹調方法演繹嘅經典泰國菜式，好似呢份精選拼盤，就有齊蝦米紙卷、春卷、炸魷魚、沙嗲雞肉同炸魚餅。蝦米紙卷味道最清爽，而沙嗲醬富花生香配雞肉好夾，炸魚餅就勝在香料味加分。炸物可以點酸辣汁，或者用新鮮蔬菜包嚟食，香口嘅同時又唔會覺得膩。
 

火山排骨（$188/大，$98/小）

必點招牌菜！採用荷蘭豬頸骨，特色係肉質軟嫩又無筋。豬頸骨先用香茅、南薑、芫茜、青檸葉等煮一個半鐘，再淋上用泰國香草、辣椒調配嘅秘製醬汁，酸酸辣辣咁零舍醒胃。
 

餐廳亦貼心地準備膠手套，方便大家拎起排骨用手食，近骨嘅位置會帶少少肥膏，特別香口。
 

紅咖哩牛肋骨配青木瓜沙律（$158）

泰式紅咖哩以紅辣椒為主，比香港人食開嘅黃咖喱更辣。呢碟紅咖哩牛肋骨就將煎香嘅牛肋骨加紅咖喱、香茅、南薑、青檸葉、椰汁等材料一齊用低溫68°C慢煮18個鐘，入味之餘亦令牛肉保持嫩中帶韌嘅口感。配搭青木瓜沙律，清爽解膩。
 

泰式番茄海鮮湯檬（$98）

呢碗泰式番茄海鮮湯檬嘅蕃茄湯底味道酸中帶辣，夏天食都唔怕無胃口。而且加入蝦肉同蟹肉，令蕃茄湯飲落更有鮮味。檬粉吸收晒湯底精華，好滿足。
 

 

楊枝甘露（$58）

估唔到泰國餐廳，甜品居然走Fusion風格，好似呢碟就以港式經典甜品楊枝甘露為靈感，但一樣有芒果汁、西柚肉同西米，但用椰子雪葩取代花奶同椰奶，椰香更濃郁口感亦更冰涼！下面係柔滑帶甜嘅白朱古力泡泡、再加清甜芒果肉同香脆蜂巢脆糖點綴，口感層次豐富。
 

香茅薑茶（$42）

Bamboo Thai  
地址：旺角亞皆老街8號朗豪坊8樓02-03號舖

文、相、片：Cathy