晚市堂食又延期，唔少情侶今年都要改食午市情人節大餐慶祝～知道大家仲未諗到食咩好，開飯仔搜羅咗多間供應午市情人節套餐嘅餐廳畀大家，有新派點心專門店推出嘅情人節午宴、日式食府嘅豐富二人套餐、心形薄餅、正宗緬甸菜及傳統意式情人節菜單，總有一間啱你同另一半心水！

新派點心專門店 Dim Sum Library 

平時情人節都係食西餐多，其實食中式都可以好有氣氛。呢間新派點心專門店推出嘅十道菜情人節午宴（兩位$688），套餐內兩款招牌點心玫瑰蝦餃及以玫瑰朱古力包均以花入饌，其他菜式包括千絲蒜香帶子皇及特別為男士同女士打造嘅雞尾酒等，絕對另你有個難忘嘅情人節。如果想再特別啲，可以參加「張保仔點心航遊之旅」，航程由中環出發前往香港仔，途中可嚐盡多款Dim Sum Library嘅特色點心！

尖沙咀海景餐廳 Hue

鍾意睇海景嘅，呢間位於尖沙咀海景澳洲餐廳就啱晒，餐廳設有巨型玻璃窗，維港景色一覽無遺，夠晒浪漫！情人節四道菜套餐（每位$1,080起）分別有三款開胃小食、前菜、主菜三選一包括烤比目魚配柑橘蓉及魚子牛油醬、水牛芝士雲吞配雅枝竹、榛子、焦香牛油及法式松露及供兩人享用嘅優質澳洲O’conner西冷牛扒配忌廉黑椒汁，最後食埋個甜品就完美～

心型薄餅 The Pizza Project

想打卡上網呃Like ？呢間薄餅專門店推出兩款心形薄餅，分別係加入Mascarpone 芝士、黑松露及意大利 Mortadella 香腸嘅Truffle Love（$190）及加入Nduja 香腸、炸辣椒、Salami 香腸嘅Amore di　Parma（$160），好味又特別。

中西式都有得揀 DPD Deluxe

呢間新開嘅多國菜餐廳行政總廚大有來頭，曾經喺多間星級酒店餐廳如明閣任職～今個情人節，兩支廚師團隊好貼心咁設計出西、中式兩款情人節套餐。西式嘅四道 菜情人節套餐（每位$388，兩位起）主菜推介慢燒牛仔肉扒配白豆蓉及牛肝菌蘑菇汁，甜品就有法式朱古力配奇亞籽紅酒草莓及焦糖開心果作結！另外中式五道菜套餐（每位$328，兩位起）用料矜貴，由米芝蓮二星中菜主廚謝志偉師傅操刀設計～

歌劇院風格意大利菜 Aria  

由擁有20年米芝蓮餐廳經驗嘅行政總廚Andrea Zamboni打造嘅7道菜意式情人節菜單 （$2,888），由時令生蠔配以香檳果凍揭開序幕，特別推介主菜A4宮崎和牛配通心薯條和自家制聖馬爾扎諾茄汁，宮崎和牛油花等級為8，入口充滿油香，最後以紅桑子辣椒朱古力畫上完美句號。

銅鑼灣獨立空間嘆套餐  COSMOS  

呢間多國菜餐廳亦有供應四道菜情人節套餐（兩位$438），包括三款法式前菜、餐湯、自選主菜同甜品，主菜選擇從慢煮挪威三文魚到烤牛肋排都有，照顧唔同口味嘅客人。重點係餐廳有29間特色獨立房間，裝修以粉系顏色為主，高私隱度，又可以同愛人享受溫馨浪漫時刻。

名牌旗艦店打卡餐廳  The Tiffany Blue Box Cafe

呢間餐廳亦推出情人節午宴（兩位$1,288起），包括北海道帶子薄片刺身伴頂級魚子醬、椰菜花濃湯，主菜則可從北海道海膽意粉及慢煮黑松露雞選一。最搶鏡嘅就絕對係最後嘅甜品，係白色同Tiffany Blue嘅鑽石心形蛋糕！再加兩杯Tiffany Blue 無酒精雞尾酒，打卡一流呀。

旺角人氣日本菜餐廳  丸十あぶり牧場

餐廳主打日式燒肉，而嚟到情人節就推出情人節套餐（兩位$988），包晒前菜梅子啫喱冷番茄、黑松露海膽茶碗蒸、3點刺身、蟹肉南瓜湯、鮑魚雜錦天婦羅、鐵板宮崎和牛厚燒配龍蝦汁炒雜菌，同鐵板海鮮炒飯，Like同Tag埋餐廳Facebook或者Instagram仲送心型甜品呀。

中環正宗緬甸菜館  Club Rangoon

留喺香港都可以有異國風情！中環呢間餐廳主打坊間較為少見嘅正宗緬甸菜，佢哋嘅『緬甸情節』套餐（每位$589起）包括沙律、前菜、主菜同甜品，海鮮控主菜必揀Khout Swel Kyaw，即係龍蝦配蒜蓉炒麵，食肉獸就可以試Arloo A Mel Thar Hin，係12小時慢煮牛肉馬鈴薯咖喱。可以選擇配埋雞尾酒，過一個微醺佳節。

文: Yanica、Cathy