情人節無論係打算出去享受燭光晚餐，定兩個人玩煮飯仔，最後當然唔少得要有一個精緻蛋糕！今年有蛋糕店以世界第四種朱古力，帶天然粉紅色嘅紅寶石朱古力為主題，另外亦有不敗嘅花藝、心形元素等，揀到啱另一半心水嘅就立刻去訂啦！
 

紅寶石朱古力紅鶴　The Cakery

（左）My Princess紅寶石朱古力香檳蛋糕（$688），（右）Flamingo Cupcake Topper紅鶴紙杯蛋糕裝飾（$30）

優雅嘅紅鶴係唔少女孩子嘅最愛，呢間以健康生活為宗旨嘅蛋糕店今年就以紅寶石朱古力嘅天然粉紅色造出紅鶴嘅精緻羽毛，食落甜中帶酸，裡面係無糖白朱古力甘納許。另外亦有紅鶴紙杯蛋糕裝飾，可以配搭店中任何一款紙杯蛋糕。
 

紅寶石朱古力寶盒　La Famille

（左）Treasure Box（$450）（海港城店限定），（右）My Princess（$298）

呢個Treasure Box外面係紅寶石朱古力，裡面紅桑莓戚風蛋糕亦配以多款雜莓、紅寶石朱古力紅桑莓脆脆、紅寶石朱古力甘納許，酸甜猶如戀愛滋味。另外亦有特別版戚風蛋糕My Princess，以紅寶石朱古力忌廉配日本士多啤梨同皇冠造型朱古力，甜而不膩。
 

紅寶石朱古力雜莓蛋糕　A-1 Bakery

（左）雜莓紅寶石朱古力蛋糕（$158），（右）紅寶石及比利時朱古力蛋糕（$158）

想一試紅寶石朱古力嘅滋味，仲有呢間連鎖日式麵包店嘅出品。紅寶石朱古力帶少少莓果香，所以雜莓紅寶石朱古力蛋糕就配以新鮮士多啤梨同流心雜莓果醬，酸甜清新。另一款就以紅寶石朱古力忌廉，配以60%比利時朱古力忌廉，雙重朱古力享受。
 

 
永生花球蛋糕　SP Flower & Tea room

（左）Make a Wish Ball（$498起），（右）My Honey（$408）

女士們都鍾意收到花，但又覺得鮮花會凋謝好可惜？呢間就推出糅合永生花球同撻餅嘅Make a Wish Ball，食完可以保留花球作為情人節禮物。另一款My Honey更加用雙色手工朱古力造出巨型玫瑰花，下面係以玫瑰荔枝啫喱配果香玫瑰慕斯嘅雜莓撻。
 

心形花束蛋糕　Vive Cake Boutique

（左）All You Knit is Love（1磅$600，2磅$1,180），（右）Violet Penelope（0.5磅$460，1磅$640）

All You Knit is Love以Pastels色調為主，上面宛如心形花束嘅裝飾相信回令女士們立刻變心心眼。下面蛋糕以粉紅同粉紫色忌廉點綴，裡面係朱古力海綿蛋糕。而Violet Penelope係淡紫色嘅雲呢拿海綿蛋糕，放上鑽石形狀嘅裝飾牌更顯高貴。
 

熱戀氣球蛋糕　Twinkle Baker Décor

（左）熱戀氣球 Balloon Adore（$368），（右）夢幻玫瑰 Rose Fantasy（$368）

熱戀中心情興奮好似飄喺半空中？咁呢款熱戀氣球就啱哂！蛋糕上面有唔同顏色嘅棉花糖，再插上心形氣球，非常Photogenic！而蛋糕係朱古力海綿蛋糕配藍莓芝士慕斯同酸甜藍莓醬。另一款夢幻玫瑰就用手造玫瑰配粉色朱古力，海綿蛋糕中係黃桃啫喱同伯爵茶慕斯。
 

初恋の香り白莓蛋糕　東海堂

（左）白莓．約定（$438），（右）粉嫩．花束（$320）

呢間連鎖店今年選用日本靜岡直送「初恋の香り」白草莓，淡粉紅嘅心錐外形配以心形蛋糕最合適！上面有白朱古力片點綴，裡面係蛋白蛋糕、士多啤梨果醬同粒粒士多啤梨果凍。而粉嫩．花束即係雜果牛油忌廉手工唧花蛋糕，精緻唧花感覺特別浪漫。
 

愛心紅絲絨蛋糕　美心西餅

（左）Sparkling Moment（$168），（右）Romantic Moment（$158）

都話愛心係不敗元素，呢間連鎖餅店今年主打心形蛋糕，Sparkling Moment係雜莓紅絲絨軟芝士忌廉蛋糕，三層紅桑子軟芝士忌廉擠花加上紅絲絨蛋糕，內外都一樣甜蜜。而Romantic Moment係玫瑰荔枝夾心士多啤梨慕斯蛋糕，水晶鏡面嘅立體心形夠搶眼。
 

櫻桃酒朱古力蛋糕　Chez Shibata

 櫻桃酒朱古力蛋糕 ($350)

呢間餅店就係由日本甜品大師創立嘅，佢哋嘅蛋糕出晒名內外兼備。情人節買返個櫻桃酒朱古力蛋糕，包你哋啲BB豬加你哋分。呢個cake，用法國特級CEMOI朱古力製，以牛奶朱古力mousse包住紅桑子果醬同櫻桃酒，濃甜微酸得嚟又香醇，醉人啊。

士多啤梨白朱古力蛋糕　agnès b. CAFÉ

 士多啤梨白朱古力蛋糕  （$48 / $298 / $488 視乎大小而定）

呢個時裝品牌同時踩埋入食界，憑甜心朱古力輕易就俘虜到一班女生嘅歡心。情人節梗係要出返個心心朱古力蛋糕啦，士多啤梨奶凍加糖煮士多啤梨，全部都係女生飛佛嘅元素，簡直就係甜上加甜。

文：Kar、Cathy
相、片：Kar