今年情人節好大機會同上年一樣無晚市，不過就算要改食午巿一樣都唔hea得！開飯仔特意搜羅咗幾間有特色嘅靚景餐廳畀大家，浪漫感十足。有日式高級料理、環境清靜嘅西餐、 酒店頂層地中海菜、宮廷風特色餐廳同高層韓國菜，有西式有亞洲菜，包保另一半滿意。
高空海景日本菜 和緣
情人節冇話一定要食西餐嘅，日本菜作為港人嘅comfort food又點可以冇咗佢～呢間餐廳主打日式割烹料理同廚師發辦料理，除咗選用當造嘅高級日本同本地食材，亦會根據四季嘅變化配合唔同嘅擺設，款款菜式都係用心之作。如冬季黑松露釜飯，成熟嘅松露一切開呈大理石花紋，大廚會喺熱飯上即刨上黑松露，再淋上香滑玉子，香氣突出。法式藍龍蝦都有驚喜，將龍蝦起肉，再將龍蝦頭烘至香脆，然後加入木魚湯熬製，最後以白麵豉調味，醬汁又唔會蓋過龍蝦鮮味。用餐時更可飽覽270度嘅無敵維港海景，真係一大享受。
圖: 餐廳Facebook、member_503669
環境清幽海景西餐 Cull ’N Pistol Hong Kong
想安靜少少過二人世界，可以試下西灣河呢間西餐廳呀。位置鄰近西灣河碼頭，環境清幽，半開放設計令食客可以邊觀賞海景邊食飯。餐廳招牌菜包括多款龍蝦及海鮮菜式，以簡單嘅方法烹調，先最可以食到海鮮嘅鮮味！好似龍蝦海鮮大雜燴，有齊龍蝦、蜆、青口、蝦同魷魚，湯底好香龍蝦味，蜆肉鮮甜飽滿冇沙，龍蝦彈牙，每款海鮮都煮得啱啱好，啱晒各位鍾意海鮮嘅情侶～
圖: sleepbeauty
酒店頂層地中海菜 Salisterra
餐廳位於49樓，多塊落地大玻璃，可以飽覽維港景色，雖然係酒店餐廳，但餐廳營造到法式小餐館嘅親切氛圍畀大家，浪漫又溫馨。餐點方面由來自倫敦嘅米芝蓮星級主廚Jun Tanaka掌舵，料理靈感源自法國及意大利沿海嘅美食，以法式料理為基礎，著重於使用時令食材，所以有唔少創意海鮮料理。好似前菜醃日本鯖魚，先以鹽、醋醃製兩個鐘，配上清新爽脆嘅青瓜粒、水瓜柳同蒔蘿，能夠平衡鯖魚油香。小龍蝦雲吞都係另一招牌，餡料包括原隻小龍蝦尾及帶子慕斯，小龍蝦尾以鹽麴醃製過鮮味更突出，加上香濃小龍蝦汁、風乾意大利鮮茄同羅馬青花菜，啖啖都係龍蝦鮮味。
圖: 浪漫花系打卡之選 Dear Lilly 
呢間裝修咁靚嘅餐廳位於IFC四樓頂層，全間餐廳都採用落地大玻璃，光線充足。一踏入餐廳可以見三個心形廂座，天花板掛滿薰衣草同洋甘菊，四周亦有唔少復古香水樽擺設，另外無論雲石地板、酒吧天花懸掛嘅紙、Menu上面印住嘅情書同情詩，都係嚟自世界大戰期間士兵送畀情人嘅情書摘錄，講浪漫氣氛真係冇得輸～食物方面Mixed Grill Platter係唔錯嘅選擇，包括多款肉類同大蝦，兩個人share食一份再飲杯酒就啱啱好。
圖: BabyAmy
海景韓國菜 名家韓國餐廳(尖沙咀)
估唔到食韓國嘢都有靚景睇～呢間位於尖沙咀嘅韓國菜就有靚海景睇，無論係韓燒、韓式鍋物定多款小菜都有得食～韓燒嘅話推介大家食特級澳洲M7和牛肉眼同美國牛肋骨，前者油脂分布均勻，食入口唔會太油膩，肉質好嫩好腍；後者肉質比較有彈性，較重肉味。另外泡菜湯、人蔘雞湯、炆牛肋骨同石頭鍋飯都係招牌菜，值得一試～
圖: 為食fatcat
文: Yanica
