潮流興慢煮，唔少新餐廳都以慢煮作為招徠，包括觀塘呢間日式丼飯店。每日供應四款慢煮丼飯，包括選用紐西蘭牛嘅慢煮火炙牛腹扒丼，以雞髀肉配雙色芝士嘅照燒鳥肉芝士爆丼等。即叫即慢煮，食客可以透過玻璃見到廚房製作過程，咁就唔怕等嘅時候會悶啦。
 

慢煮屋位於觀塘一座工廈當中，係唔少附近上班一族嘅飯堂。全日供應四款日式慢煮丼飯套餐，貴精不貴多。套餐附送嘅前菜同餐湯大概一個星期換一次，餐湯更加係無添加味精嘅蔬菜湯，感覺都健康啲。
 

薑汁醬燒豚肉丼（$88）

以美國豚肉片為主，加上醬汁食落惹味得嚟又唔會蓋過豬肉香，不過以慢煮嚟計就略嫌肉質硬左啲啲，而且薑汁味道唔夠突出。不過勝在豚肉份量十足，多到可以遮住哂啲飯，加埋中間有隻半熟溫泉蛋，撈埋蛋汁食就啱啱好喇。
 

薑汁醬燒豚肉帆立貝丼（需預訂 $88）

嚟呢度食飯最好先訂檯，皆因預訂再Like加Share佢地Facebook嘅話就可以免費升級！最新升級版就係呢款薑汁醬燒豚肉帆立貝丼，喺上面加上輕烤帆立貝，帆立貝用嘅係刺身級別，啖啖鮮味口感嫩滑。
 

慢煮火炙牛腹扒丼（$108）

而牛魔王就一定要叫呢款火炙牛腹扒丼！選用新鮮紐西蘭牛肉，抽真空再慢煮以保持肉質嫩滑，火炙後再淋上秘製燒汁、黑椒同蒜粒。食落果然相當軟腍，部分有少少筋。牛肉油花分布平均，肉味香濃。而且調味得宜，燒汁配粒粒分明嘅珍珠米，撈飯自然夠好味。
 

 

照燒鳥肉芝士爆丼（$88）

選用美國300+雞髀扒，同樣抽真空再慢煮，加上水牛同車打芝士後燒香，一上檯就聞到香噴噴嘅芝士同雞油味！食落雞肉亦非常嫩，而且肉質結實唔會過腍。雞肉本身已經有入味，加埋雙色芝士就更加香口。
 

慢煮三文魚配牛油果丼（$98）

顏色非常豐富，而且蔬菜份量唔少。主要係慢煮挪威三文魚扒，撕成粒粒後加用檸檬、柚子胡椒等調製嘅橘子醬汁，令魚肉味道更清新，再配同樣富含Omega 3嘅牛油果粒、青瓜、紫菜、魚子等等。賣相吸引之外口感層次都非常豐富，味道清新完全無油膩感。
 

慢煮屋
地址：觀塘開源道60號駱駝漆大廈3期11樓G室

文、相、片：Cathy