圖: ericoheric、香港理工大學

新型冠狀病毒患者除咗以飲食調理身體，亦可以從運動入手，重塑身體機能。開飯仔繼上星期整合咗14款各大學醫學院同中醫師嘅調理湯水、藥膳（按此），今日就介紹香港理工大學嘅「康復八式」運動，等各位患者更全面恢復健康。

按3R進度設計康復治療方向

世界衞生組織（世衛）上年指出，大多數新冠患者喺康復後幾個月內會出現呼吸困難、疲倦、認知功能障礙等唔同症狀，而呢啲中長期影響統稱為「COVID-19 長期影響」 (「長新冠」)。而香港理工大學（理大）康復治療科學系團隊，自2020年10月開始對新冠患者進行追蹤研究，探討佢哋康復後嘅健康狀態、心理同健康相關生活質素，並了解其3R（重建體魄Rebuild fitness、重拾信心Regain confidence、重獲生活Resume normal life）進度，作為設計康復治療方向。

研究對象係由5間本地醫院轉介嘅新冠患者，跟進佢哋確診後6個月同12個月嘅康復情況，評估其心肺功能、體能、疲勞程度同生活質素等。當中逾40%人仍然受「長新冠」症狀困擾，有疲勞、下肢肌肉乏力等情況，影響日常生活：
- 確診後6個月內：約42%出現「疲勞綜合症」
- 確診後12個月：約43%仍然有「疲勞綜合症」情況
（成人同長者出現「疲勞綜合症」嘅情況相若；一半女性研究對象出現「疲勞綜合症」，而男性則只有30%。）
疲勞評分同肺活量、下肢力量有關，研究顯示採取適當康復治療方案後，相關身體機能會有所改善，而康復八式就係其中一種。

康復八式

理大團隊制訂1套為期6星期嘅訓練計劃^，入面包括由理大團隊設計、8種動作組成嘅「康復八式」，以鍛煉全身唔同肌肉組群、促進心肺同肌肉健康為目的。理大康復治療科學系副教授黃宇樂博士表示︰「『康復八式』動作簡單，每組運動需時約8至10分鐘，亦可以按自己嘅身體狀況調節運動量同時間，循序漸進提升體能，達致重建體魄、重拾信心、重獲生活嘅目標。」黃博士補充，「康復八式」亦適合疫情期間，因留家抗疫而減少外出活動嘅市民，大家可以跟以下由理大製作嘅示範影片喺屋企鍛鍊身體：

^研究期間，24名新冠康復者喺理大物理治療師指導下，每星期進行2次訓練課堂（每次60分鐘）同3次家居運動（每次30分鐘），透過唔同形式嘅運動提升肺活量、改善肌肉力量。完成6星期訓練後，大多數參與者嘅肺活量同下肢力量均有提升，疲勞情況亦有改善：
- 近40%新冠康復者嘅肺活量有所提升
- 逾60%新冠康復者嘅下肢肌肉增強
- 有「疲勞綜合症」嘅康復者中，當中75%已回復正常

（原文按此）

預告：嚟緊重有營養師嘅調理飲食指南～