誇張啲講句，話文華酒店嘅海南雞飯係新加坡嘅國菜都冇講錯，自1971年起就一直吸引各地旅客慕名去食，相信唔少香港人亦都試過。嚟緊，大家唔使搭飛機都食到啦，呢間鼎鼎大名嘅海南雞飯始祖餐廳，要進軍海外巿場，仲揀咗香港做首站添！下星期五就會喺尖東新場K11 MUSEA度試業啦。

招牌主打毫無懸念，一定係文華海南雞飯啦！雞肉慢煮50分鐘，肉質鮮嫩滑溜，仲要係無骨添，啖啖肉好鬼爽。由雞湯同雞油烹煮而成嘅飯，粒粒分明仲有少少鹹鹹地，點埋特製雞飯醬油，加多啲啲薑蓉同辣椒醬，就好似飛咗去新加坡一樣。

每個地方嘅肉骨茶都有啲唔同，馬來西亞嘅藥材味重啲，而新加坡嘅就會胡椒味出啲，而嚟到香港，師傅亦特別為香港人重新調配過各項食材嘅比例，兩者味道變得平均、相若。以豬骨、胡椒粒、蒜頭熬製嘅白胡椒肉骨茶配白飯，味道香濃而辣度適中。

新加坡美食點少得喇沙？餐廳除咗有食開嘅喇沙外，仲有乾炒喇沙，夠晒特別！招牌珍寶帶子喇沙嘅帶子大大粒又鮮爽，湯底富椰奶香味，仲有絲絲菇條同麵條一齊食到，口感豐富。而乾炒喇沙意粉配豬扒亦以椰奶、喇沙醬配搭成獨特醬料，香口惹味。

麵食以外仲有唔少小食選擇，心大心細選擇困難症發作時，咩都唔好諗，叫呢碟鹹蛋雞翼就啱喇。外皮香脆，陣陣鹹香就梗喇，仲有啲咖喱香同微辣添，原來係用咗咖喱粉醃製呀隻雞翼。

傳統甜蝦醬蔬果花生沙律（rojak）亦有別於一般嘅沙律，一粒粒嘅有沙葛、青瓜、蕃石榴等全部都係好爽口嘅蔬果，食落sharp sharp聲，拌勻特調嘅蝦醬，甜甜der。

好似食咗好多嘢，但又硬係爭緊啲嘢咁？梗係啦甜品都未出場！呢個超吸睛又巨型嘅珍寶美祿雪花冰配意大利芝士蛋糕，係香港限定嘅款式嚟。大份到就算兩個人都應該未必得食晒！唔好以為淨係得面層見到嘅美祿波波同士多啤梨，以為嗶幾下刨冰就搞掂。少年你太年輕，喺勁香美祿味而又輕盈嘅刨冰中心，收埋咗件超濃香嘅意大利芝士蛋糕啊！整到成座雪山咁高係有原因㗎～～　

而招牌椰子雪糕同樣打卡able，椰殼內放入堅有椰子果肉嘅椰子雪糕，再插埋紅毛丹、放上核桃等，好清甜。食晒啲雪糕之後記得唔好嘥，要嗶埋啲椰青出嚟食呀！

 凍美祿恐龍、涼粉豆漿

Chatterbox Café
地址：尖沙咀梳士巴利道18號Victoria Dockside K11 Musea B1樓B110號舖
預計試業日期：9月6日

文：Kar
相、片：Tom Li