香港人鍾意食辣嘢，川菜近年喺香港都愈來愈受歡迎。尖沙咀最近新開咗間兩層高嘅川菜館，餐廳大廚符師傅已經有二十幾年烹調四川菜經驗，曾主理過多間正宗川菜餐廳， 除咗傳統四川菜，今次將大玩新舊派川菜融合，創出唔少新派川菜！餐廳裝潢選用紅色主調，傳統中見型格，牆上嘅壁畫亦增加咗餐廳川味元素。

巴蜀香辣蟹，師傅嚴選肥美嘅肉蟹，配以主廚自家調製嘅十多種香料同醬料炒成，香料同醬汁充份滲進蟹身。味道辛香之餘唔會搶過蟹嘅鮮味。味道真係幾辣吓，食得辣嘅開飯仔囡要嚟挑戰吓！

呢味霸王雪中紅其實就係喺傳統嘅四川麻婆豆腐上加上波士頓龍蝦，波士頓龍蝦肉質結實彈牙，麻婆豆腐反而辣度減少，多咗份龍蝦鮮味，撈飯食最正。

講到川菜又點少得酸菜魚，不過呢度就唔係用普通魚，而係龍躉啊！酸菜魚沙巴龍躉湯底用沙巴龍躉骨熬製，加入四川風味泡菜同泡椒，有魚湯嘅甜味外仲有酸辣，龍躉肉都好嫩滑～

水煮牛同水煮魚都聽得多，但呢度就有四川水煮低溫三文魚！三文魚用低溫處理，令肉質保持嫩滑，配上自家製嘅水煮配方，夠晒惹味～

呢味紅花椒乾辟松露慢燒乳鴿，乳鴿先用煙燻同慢煮方式，再將乳鴿外皮炸脆，配以紅花椒汁同松露，最後用蘋果木煙燻上碟。

有時點都要食啲澱粉先飽肚嘅，夏日炎炎不如食返碗涼麵啦～招牌好川涼麵帶有微微酸味，惹味得嚟唔太漏。

最後梗係要食返個甜品，呢個榴槤鍋餅榴槤味濃郁，榴槤控絕對不可錯過！

餐廳內仲有三間vip房畀一大班人聚會用，而且其中一間仲有得打牌唱k，一邊食川菜一邊打牌唱k真係未試過啊～

好川好菜

地址: 尖沙咀堪富利士道11號堪富利士大廈2-3樓

文: Yanica

相、片: Tom Li