今時今日餐飲業難做，撐得過一年半載已經好厲害，想逆市求存就要諗諗新意思。喺新蒲崗經營咗7年嘅街坊麵包舖最近搖身一變，翻新成為新派年輕路線嘅話題餅店，仲新增咗好多驚喜麵包款～

新蒲崗7年街坊麵包店翻新重開

位於新蒲崗嘅街坊麵包店經營近7年多，由前酒店餅廚兼店主嘅Hazel主理，Hazel喺開店前已有25年烘焙包餅製作經驗，更曾於德國麵包廠學藝，可以講係鍾愛麵包製作。餅店自7月頭翻新重開後，店舖形象煥然一新，相比裝修前嘅舖面同店內環境似舊港式餅舖風格，翻新後舖面明亮，明顯同舊貌有好大分別。Hazel表示翻新係因為原本嘅裝修老化，趁機藉住翻新機會，一併推出新品吸引更多人幫襯。

左：翻新前｜右：翻新後（原圖：歡歡增肥之旅）

重開後除咗照常供應招牌炸包、港式麵包、原個蛋糕之外，新置嘅透明甜撻櫃同井井有條嘅麵包層架仲擺滿今期流行嘅酸種千層蛋撻、千層酥盒同酸種麵包，成為附近街坊嘅新寵包款。

新品隨住店舖翻新重開一併登場

開心果/榴槤貓山王酸種千層蛋撻

熱潮有增無減嘅千層撻呢度都食到，而且仲有四重開心果口味！一個好食嘅撻要由酥皮做起，餅底選用德國酸種、法國牛油同日本麵粉製成麵糰，冷藏至少一日後，需摺酥、輾平麵糰至均勻厚度；再人手以𠝹刀𠝹劃麵糰至合適大小，最後喺餅底戳上小洞以防烤焗時澎脹，先可以入焗爐。酥皮要做到層層分明，除咗摺酥功夫重要外，用𠝹刀分割麵糰都可以令酥皮層次突出，層理更加明顯。

千層蛋撻嘅酥皮約有16層，層理分明

最受歡迎嘅開心果味由蛋漿到裝飾都有滿滿開心果元素！千層撻底部會先加入開心果醬，再倒入混合意大利開心果醬製作嘅開心果蛋漿，焗製25分鐘出爐後，喺熱辣辣嘅狀態唧上開心果醬同灑上開心果碎，相比單純喺原味蛋撻唧上開心果醬，味道更有層次同濃厚～趁熱咬落去，酥皮好似薯片咁脆，濃郁開心果味喺口腔慢慢散發，獨食夠晒滿足啊。

手掌心大嘅蛋撻好足料，順滑開心果蛋心同開心果醬配合得好好

酸種開心果千層撻（$18）

開飯仔當日試嘅貓山王榴槤千層撻（$25），有超過一半都係榴槤果肉

首創焦糖燉蛋酥盒 即叫即燒！

Hazel仲加入酥盒系列，即係將酥皮麵糰塑成圓盒狀，再填滿內餡，而小店供應6款口味，分別有焦糖燉蛋、開心果、黑糖珍珠阿薩姆紅茶、朱古力、綠茶以及Tiramisu。Hazel推介初嚐人士可以先試焦糖燉蛋酥盒，燉蛋內餡主要選用蛋黃、法國忌廉、吉士粉同雲呢拿香油混合而成，需時50分鐘先焗成出爐。食客落單時，師傅會即時於表面灑上砂糖並即叫即燒，火炙成香脆微焦嘅薄脆面。

焦糖燉蛋酥盒（$30）

開飯仔仲試咗黑糖珍珠阿薩姆紅茶燉蛋酥盒，嫩滑紅茶蛋心同酥脆酥皮有明顯嘅口感衝擊，表面配埋煙韌Q彈嘅珍珠，好似還原珍珠奶茶咁，都幾過癮。

黑糖珍珠阿薩姆紅茶（$30）

招牌炸包回歸

餅店嘅即叫即炸Berliner炸包，賣相有啲似外國流行嘅冬甩，但其實係Hazel喺德國學藝時，當地常見嘅一款街頭小食。帶到嚟香港，做法同當地一樣，即叫即炸，表面裹上砂糖，最後唧入冰凍吉士餡，外型脹卜卜，入口冰火交融！最近更推出新口味，如開心果、香橙、芋頭、玉桂蘋果等等，15款口味輪流試～

上：開心果炸包（$30）｜下：貓山王榴槤（$45）

理想餅店
地址：新蒲崗康強街32-34號康強洋樓A座地下7號舖

文：Sharon
編：Cathy
相：Yan Yan