來自日本宮崎，於全國有超過150間分店嘅居酒屋塚田農場，最近嚟咗香港開分店喇！位於尖沙咀海運大廈2樓，向住郵輪上船方向一直行就見到架喇。呢一邊係新開，冇郵輪遮住嘅無敵海景，海景比LCX更開揚，仲有露天位可以坐。
呢間係日本直營店，所以部分招牌菜係100%移植本店，好似美人鍋湯底由日本運來，用雞骨熬製8個鐘，完全無添加，冷卻之後變成布甸狀。加熱之後仍然食得到漿口嘅質感，雞味極濃郁鮮甜。配菜有日本蔬菜及本地水耕菜、兩款自家製手打雞肉丸，加埋半隻日本走地雞，份量足兩人用。如果唔想食鍋物，可以試用同一款湯底嘅拉麵。
另一款招牌就係炭燒雞，香港店同樣用備長炭，日本走地雞肉只輕輕調味，放在炭火上燒，灒上三次雞油，即時火光熊熊，唔係純粹為拍攝效果！雞肉放上鐵板仍然熱到滋滋聲，呈炭黑色賣相好似麻麻，但食落勁滑勁juicy，係個人嘅心水推介！
美人生春卷都幾特別，似越南米紙卷同日本壽司嘅混合體，廚師用米紙包住魚生同蔬菜，有三文魚牛油果、吞拿魚長芋、海老牛油果、鰻魚忌廉芝士同雞肉炸茄子五種配搭，餡料爆多，米紙放得耐亦唔會變硬變乾，每款都配上自家醬汁，清新又唔膩。
最後呢個下午茶兩層架，好多人柯打。二人前可以自選六款甜品，包括4款丸子、蛋糕、Tiramisu同多款口味嘅雪糕，美人甜卷包住鮮果、白玉、紅豆同紫薯，又幾夾喎！鹹點有廚師推介嘅兩款美人卷，兩款壽司卷物。
地址：尖沙咀廣東道17號海港城海運大廈2樓OTE 202號舖
文：Perrins