奶茶同鴛鴦可以稱之為香港最有代表性嘅飲品，港式奶茶製作工藝更加係非物質文化遺產，茶葉調配、煲茶、焗茶及撞奶等都講求經驗及技巧。飲杯奶茶唔難，但要飲到一杯好茶就要由大師傅炮製。灣仔嘅我杯茶，話係全港最好嘅奶茶都冇誇張，由曾勇奪香港及國際金茶王美譽嘅羅德師傅主理，開業一個月左右長龍不絕，每日平均賣過千杯！
羅德師傅有超過40年沖茶經驗，今次出山開店，除咗想將港式奶茶文化發揚光大，亦希望協助年青人及傳承文化。羅師傅功夫紮實，三兩吓極速已沖出靚茶。西冷紅茶用老中青茶葉調配，再配黑白淡奶，看似簡單，其實當中大有學問。羅師傅說：「一杯優質靚茶講求香、色、味，奶衣不能過厚，亦要有掛杯效果。沒有一套標準，沖茶全靠經驗。」
所有奶茶喺開放式水吧沖製，羅師傅熟練手勢先加糖，之後左右手並用，一邊倒茶一邊撞奶，最後細心去掉面層泡沫即成，全程唔使30秒。奶茶入口幼滑，完全冇澀味，茶及奶香平衡帶回甘，即使已加糖都不覺過甜，如完全走甜亦可以要求。
鴛鴦亦是店子主打，加咗咖啡的奶茶，聞落有陣陣咖啡香，但飲起上來仍是奶茶味為主導，同樣香滑，比奶茶更多一份層次。難得由茶王主理，都只是賣$16杯，更有玻璃樽裝($25)，外賣更加方便。
食物以簡單港式三文治為主，有即烘菠蘿油、滑蛋治等約9款，炒蛋夠香滑，但必吃係自家製沙嗲牛肉，用新鮮牛冧肉製成，唔會醃到過腍及冇晒肉味，沙嗲汁亦濃淡得宜夠惹味。
沙嗲鮮牛肉治烘底加牛油 $30
炒滑蛋菠蘿包 $20
新店外賣為主，只有幾個吧枱座位。無時無刻都有人排隊幫襯，不過食物算出得快，如果想慢慢食同茶王閒談，就要避開食飯繁忙時間啦。
地址：灣仔春園街6號永興樓地下
文、相、片：Perrins