鍾意飲茶嘅你有口福喇，旺角最近新開咗間以茶做主題嘅Cafe，店主去完台灣拜師學藝之後仲將當地嘅原茶葉帶嚟香港。由近年大熱嘅冷泡茶，到以茶入饌配合時令水果整嘅捲蛋、戚風蛋糕等都應有盡有喔。
 

位於旺角女人街樓上嘅小念頭旺中帶靜，上到去裝修好Homey，舒服得嚟最吸引嘅係有大玻璃窗，自然光透入嚟影相打卡都靚啲。而且有埋插座畀大家叉電，Hea足半日無難度。
 

季節茶香甜品

 焦烤菠蘿烏龍戚風三文治（$45）

因為舖仔細細，店主每日都會去採購時令新鮮水果，所以甜品Menu會不定期更換。開飯仔採訪當日就有呢款用咗台灣鳳梨搭配烏龍茶嘅戚風三文治。戚風蛋糕濕潤而保持彈性，口感輕盈。而味道主要嚟自中間嘅台灣烘烤烏龍茶忌廉，茶甘味道非常突出。配埋烤過嘅焦糖鳳梨，多汁清甜又有一絲絲口感，增加咗口感同甜味嘅層次。
 

愛文芒果紅茶捲蛋（$45） 

同樣係時令嘅台灣愛文芒果，今次就配英國進口嘅Earl Grey。同戚風三文治一樣，蛋糕濕潤微甜，茶味主要嚟自中間嘅紅茶忌廉，茶香芬芳醇厚。中間係一粒粒愛文芒果果肉，香甜之餘又同紅茶香好夾。而上面嘅芒果醬相比起嚟就味道較淡，勝在口感幼滑。
 

 鐵觀音芝士蛋糕（$40）

雙層芝士蛋糕加上通透嘅鐵觀音啫喱，賣相先加分。入口先食到芝士嘅酸味同奶香，但之後就會有鐵觀音嘅茶香慢慢由喉嚨滲出嚟。原來呢件蛋糕上面係鐵觀音法式慕斯，茶味突出唔太甜，而下層係Cream Cheese蛋糕，茶香同芝士香各佔一半，非常易入口。啫喱同朱古力醬都偏甜，可以按自己口味加埋一齊食。
 

 
輕食+茶飲推介

法式蕃茄牛肉乳蛋批（$68） 

幾個女仔想嗌多個輕食一齊Share嘅話，呢個法式蛋批就啱啦。口味一樣會按季節更改，開飯仔試到嘅呢個有新鮮製造嘅肉醬、車打芝士、雞蛋、紫洋蔥等配料，牛肉同洋蔥都夠哂惹味，車打芝士同酥皮亦焗得香而不膩。配搭嘅沙律加咗檸檬汁同橄欖油調味，味道清新。
 

冷泡金萱茶（$40） 

店主曾經去台灣跟一位有30年經驗嘅師傅學沖茶，唔單止將當地嘅飲茶文化帶嚟香港，仲引入埋台灣嘅原茶葉嚟小店。好似呢杯冷泡茶就用咗金萱茶用室溫浸泡約八個鐘，之後再雪凍，唔需要加冰都夠哂透心涼。入口清香，After taste嘅甘味突出，最後喺口腔留有少少甜味。呢個就係冷泡茶嘅其中一個優點，長時間浸泡令茶葉香味完全釋放。而另一個優點就係少啲咖啡因，對咖啡因敏感嘅朋友仔都可以一試。
 

手煮鐵觀音黑糖奶茶（$38） 

而熱飲亦有相當花心思嘅手煮奶茶，即點即煮可以縮短茶葉浸泡熱水嘅時間，一樣可以減少苦味。而且步驟同細節都相當講究，例如要先煮茶再加入牛奶，令鐵觀音茶香充分釋出。奶茶會加入黑糖同少少煉奶調味，飲落茶香同奶香平衡，無港式奶茶咁苦，但一樣有餘韻。
 

暫時Menu都會有兩款芝士蛋糕、布丁、雪糕蛋糕、戚風三文治、捲蛋同蛋批。最後溫馨提示一句，小店逢星期一休息，唔好去摸門釘呀。
 

小念頭
旺角通菜街75號1樓

文、相、片：Cathy