食甜品心情會好啲，食到好睇又好味嘅甜品心情就更好！荃灣呢間新Cafe主打一系列創作甜品，運用時令水果同唔同食材配搭出新意，從味道到口感都有驚喜。另外亦有西日風格主食，特別係定食賣相精緻又豐富。加上木系簡約裝修、落地大玻璃同高樓底，感覺特別Chill。

KoBaNe by Minimal店名取自日文「こばね」，意思係「細小嘅羽毛」，延續位於深水埗嘅主店迷你毛簡約而有玩味嘅主旨。新店坐落荃灣南豐紗廠，亦係寵物友善餐廳。
 

季節限定！時令日本水果甜品

蜜柑芝士撻配山椒柚子雪芭（$72）

餐廳負責人指Menu會不定期更換，皆因會按時令挑選唔同食材製作甜品，例如呢道開業至今大受歡迎嘅蜜柑芝士撻預計會供應至出年二至三月為止。上層係口感輕盈微甜嘅雲呢拿吉士同柚子忌廉，中間係自家糖漬日本蜜柑，下層就係芝士撻。蜜柑相當香甜多汁，同下層嘅芝士香好夾。芝士撻嘅焦糖面同香脆餅底增加口感同香氣層次，配搭山椒柚子雪芭，滿滿柚子皮清香同微微麻勁可以平衡芝士膩度。
 

自家製特別口味雪糕+雪芭

粟米焦糖酥盒配乳酪雪芭（$78）

平時食粟米都係鹹食多，估唔到做甜品一樣得！自家製酥盒裡面係粟米吉士同拖肥，粟米吉士有粟米香得嚟鹹鹹哋，加埋帶焦糖香嘅拖肥、酥脆而層層分明嘅酥皮夾埋啱啱好。配搭酥盒上面嘅日向夏柑同自家製乳酪雪芭，酸酸甜甜可以Refresh味蕾。
 

士多啤梨接骨木沙冰配羅勒雪糕（$68）

餐廳所有雪糕、雪芭都係自家製作，好似呢杯當中嘅羅勒雪糕，口感柔滑而且有好濃郁嘅草本香氣。搭配清甜嘅日本士多啤梨、士多啤梨果醬、接骨木沙冰、脆脆、奶凍同煙燻茶啫喱，味道同口感層次豐富，同時相當清爽，係開飯仔嘅私心推介。
 

精緻日式定食

味噌燒比目魚·定食（$135）

日式定食以木盤奉上，上面有時令前菜、筑前煮、味噌燒比目魚同紫菜飯。前菜會以清爽嘅蔬菜為主，拍攝當日就有柚子蘿蔔、青瓜同玉子燒，作為開胃小食一流。而筑前煮裡面有各種菇、蓮藕、紅蘿蔔、薯仔等野菜。燒比目魚以赤味噌同白味噌調味，取前者香味同後者嘅甜度，加上魚油嘅甘香好啱送飯！比目魚旁邊嘅雞骨棒係混入雞軟骨嘅雞肉，口感豐富。
 

壽喜燒牛肩肉鹿茸菇燴飯（$115）

另一款非常受歡迎嘅主菜係壽喜燒牛肩肉鹿茸菇燴飯，肉質軟嫩適中嘅牛肩肉以日式壽喜燒醬汁煮過，醬汁甜味融合牛肉脂香，加上溫泉蛋就更滑溜香口。而鹿茸菇燴飯口感偏軟，菇香非常濃郁。
 

日本黑糖/凸頂柑製作特飲

（左）沖繩黑糖薑泡沫咖啡（$46）、（右）九州凸頂柑梳打（$46）

以自家磨製嘅薑汁加上泡沫咖啡，頂層再灑上沖繩黑糖，入口先飲到薑汁嘅辛辣味道，然後綿密厚身嘅泡沫同沖繩黑糖帶嚟嘅甜味，最後餘韻係咖啡嘅醇香，味道豐富又暖胃。咖啡豆係嚟自合作嘅咖啡烘焙商，會偏向選用帶Nutty香、或者風味平衡嘅種類。

凸頂柑又名不知火柑，香氣獨特甜中帶酸。製作成梳打有亮眼嘅橙色漸層，甜度適中味道清爽。
 

KoBaNe by Minimal

地址：荃灣白田壩街45號南豐紗廠1樓103號舖

文：Cathy.H
相、片：Yan Yan