第30屆香港書展7月17號開鑼，就算唔係真·文青都忍唔住去行返轉。行完買完就當然要搵間餐廳開飯兼休息下，開飯仔就幫大家搵咗灣仔區五間話題新餐廳，啱就記得Bookmark先啦。
回到八十年代大排檔 杜老誌大飯店
八十年代灣仔嘅杜老誌夜總會好出名，嚟到2019年有幾位80後開餐廳就用返呢個名，同時將八九十年代嘅香港風情帶返嚟，裝修有齊大排檔、機舖、麻雀館、夜總會等場景。食物以懷舊粵菜為主，花蛤蒸水蛋將新鮮花蛤砌到好似朵花咁，蒸蛋鮮甜又滑溜，係必點菜式。
圖：dywc
健康巴西莓果碗 ÍAÇA Superfood Bar
巴西莓果碗（Acai Bowl）係近年大熱嘅Superfood之一，呢度嘅巴西莓果碗有唔同大細，亦可以再加唔同配料Topping，巴西莓味道酸酸甜甜咁，加埋配料凍食真係幾消暑。仲有其他店較為少見嘅古布阿蘇果碗（Cupuaçu Bowl），同樣有助抗氧化，味道有啲似香蕉，值得一試。
更多【灣仔餐廳推介】： |
必試無味精燉湯 無極手工麵.燒烤.私房料理
無論行得攰唔攰，飲返碗燉湯補返下都係好嘅。呢間主打養生燉湯，標榜原汁原味唔加味精同鹽。想飽肚可以嗌東方美人麵餐，東方美人燉湯用竹絲雞、蟲草花同桃膠等燉製而成，而麵就另上，當湯麵或拌麵食都得。而晚市供應嘅手工燒烤口碑都唔錯。
蕃茄18變 Tomato Story
香港嘅夏天咁悶熱，呢個時候最啱食酸酸甜甜又Juicy嘅蕃茄。呢間餐廳睇名都知道係用蕃茄做主題，勝在小店有心思，好似蕃茄湯通粉系列，湯底用成60斤新鮮蕃茄同蔬菜熬煮，唔用茄膏，味道自然。而咖喱蕃茄飯或蕃茄焗飯系列都唔係用一般白飯，而係自家製蕃茄飯。
圖：LIOLEUNG
亞洲Comfort Food Cafe Hungry Tiger
呢間酒店餐廳主打亞洲Comfort Food同手沖咖啡，最啱成班朋友一齊嚟，有齊日、泰、越、中等唔同選擇，總有一款啱食。而Brew Bar每日都有駐場咖啡師，按季節挑選唔同產地咖啡豆，以唔同方法沖調一杯屬於你口味嘅咖啡。咖啡唔啱？細細聲話埋畀你聽，同一層嘅Wako Sake Bar都係新開，係香港首間自助日本酒放題吧！
圖：sugarcat
文：Cathy