一年一度嘅書展開鑼喇，有冇打算去行返轉買吓書先？灣仔呢排開咗有唔少新餐廳，今次幫你搵咗五間新店，未去之前、行完之後要醫肚，就睇睇以下餐廳啱唔唔啱你心水喇！
鰻魚竹炭漢堡 I’m Nuts
圖：小店開業冇耐，主打意粉、漢堡及蛋糕等輕食同咖啡，店中有一道長舌鰻魚牛肉竹炭漢堡，全黑嘅漢堡包入面有原條鰻魚，醬汁香甜，同牛肉原來又幾夾！店內畫滿可愛漫畫公仔，行完書展來嘆杯咖啡抖抖就最啱！
米芝蓮生煎包 祥興記上海生煎包
圖：shuki cheung、cheunghingkee2013
呢間荃灣發跡嘅生煎包，曾獲米芝蓮推介，本店結業後喺各區開枝散業，終於都開到嚟港島！生煎包皮薄又爆汁，香脆又夠熱，除咗原味仲有鮮蝦同埋黑松露，最緊要係抵食。不過冇位坐只能夠立食，行完唔攰嘅話一定要試。
更多開飯專題： |
清新健康有機餐 簡·愛
圖：相信好多人成日飲食都唔健康，呢間餐廳以有機食材製作菜式，健康餐會配有機糙米及藜麥，更寫明卡路里，唔怕肥啦！用料都唔錯，如有機豆腐、法國走地雞、紐西蘭大蜆、西班牙黑毛豬等，環境舒服又有得訂座，慢慢坐低食個晚餐。
即叫即製爆餡煎餅 御廚煎餅
圖：argum
另一間都係啱掃街嘅小食，呢間煎餅店只做外賣。所有柯打即叫即製，新鮮熱辣，有充滿地方風味嘅孜然羊肉、北京烤鴨等，亦有新派嘅蛋包流心芝士薯餅、黑白墨魚煎餅等等，每份加埋青瓜同蘿蔔，餡料份量十足。
靚靚蛋糕小店 完美咖啡室
圖：買完書食啲甜品補充體力先！呢間甜品點有多款自製蛋糕，賣相精緻，好似抹茶卷蛋、草莓忌廉蛋糕、紫薯蛋糕等，不過最靚都算係海洋feel嘅冧酒提子蛋糕，仲有珍珠同貝殼喺面！供應全日早餐、意粉等鹹食，但座位就唔算多。
文：Perrins