近年香港開始興起一陣台式火鍋熱，但好多價錢都唔算經濟，每次都食得唔盡興～旺角近排新開一間120分鐘吃到飽台式火鍋店，供應九款特色台灣湯底，價錢分三個等級，最平$148就任食到基本肉類、配料及小食，而今次開飯仔就介紹最高等級畀大家，除咗無限任食靚肉，菜單上所有嘢任叫，最平時段$238就食到，一樣咁抵食啊！

紅燒牛骨鍋

首先就講湯底先，湯底可以話係台式火鍋嘅靈魂。所有特色湯底都以全天然食材製作，客人可以放心「先喝湯，後火鍋」。紅燒牛骨鍋採用牛腿骨先燒後燉而成，湯底散發濃郁燒牛骨香味，而且經過慢燉可以釋放牛骨中嘅營養物質，燉煮途中仲需要耐心撇去浮沫令湯頭保持清澈。

台灣鳳梨雞鍋

鳳梨雞鍋係台灣最經典嘅古早鍋，以鳳梨搭配苦瓜熬制。湯底帶些少酸及清甜感覺，啱晒咁多位鍾意輕盈感嘅女士。

秘方麻辣鍋

講到台式火鍋又點少得麻辣鍋，麻辣鍋同樣加入先烤後煮嘅牛骨，具有牛骨清香。再以辣乾、大紅袍花椒、郫縣豆瓣及三十多種中藥材熬成，辣味溫和，仲有得自選辣度添～鴨血都係由台灣直送。

眷村白玉酸菜鍋

選用自然醃漬發酵嘅酸菜，配埋五花肉及蛤蜊等食材，酸得嚟仲帶有鮮味，又幾開胃。

想食好啲嘅開飯仔囡們，可以考慮試試最高等級，因為呢個價錢係可以試晒菜單上嘅所有食物，包括最靚嘅牛肉，如澳洲和牛M5牛肩卷、手切封門柳及安格斯一口牛肉粒，仲會每人送兩粒M9澳洲和牛牛丸，牛魔王不可錯過！

另外餐廳仲有供應多款任食火鍋配料及小食，無咁大個胃啊？等開飯仔揀幾款介紹吓啦。必食嘅有秘制滷水，滷水牛筋、牛肚及大腸都係用上等藥膳每日新鮮滷製，滷水味香濃，配麻辣鍋食就最啱。

蟹籽墨汁漿、干貝鮮魚漿及台灣海鮮漿都彈牙有口感；特色瓜仔雞水餃喺香港好少見，嚟到真係要試吓。

有唔少配料都係由台灣直送，夠晒台灣味！如爽口嘅屏東水蓮菜及手工川丸子等；至於唔食牛嘅朋友，呢度都有多款其他肉選擇，如西班牙豬梅肉及五花、花雕酒雞件及紐西蘭羊卷肉。

唔係淨係打邊爐，小食都有好多選擇！如邪惡嘅即炸午餐肉，就咁食同打邊爐都得～仲有士林鹽酥雞、真醋小香腸及梅甘酥脆薯啊～飲品方面都唔係淨係得汽水，有好多台式飲品揀啊～

120分鐘吃到飽套餐(*加一服務費)

牛大人台灣火鍋吃到飽

地址: 旺角彌敦道628號瓊華中心9樓

文: Yanica

相、片: Tom Li