喺而家呢個「相機食先」是常識吧嘅年代，搵餐廳除咗食飯仲要食環境。長沙灣呢間Cafe就啱哂各位Foodie同少女（或老少女）去打卡，粉紅色枱櫈、霓虹燈字句、Postcard牆、乾燥花等等得意道具周圍都有。而且食物水準同賣相都唔錯，餵飽相機之餘仲餵得飽你個胃嘅。
 

花說由兩位九十後少女主理，裝修甚有韓式Cafe感覺，以女孩最愛嘅粉色做主調，枱上放滿得意小道具，未食嘢之前就已經可以瘋狂Selfie一番。Cafe環境唔大，半開放式廚房增加空間感而且油煙味唔大。Menu以西式輕食為主，好似沙律、雞翼、意粉等。
 

想食豐富啲當然要嚟返份全日早餐，Set C有紅白腸、煙肉、焗豆、炒蛋、薯條、沙律、牛角包，特別在配埋半個牛油果。最有心機嘅係中間嘅炒蛋，唔單止加咗黑松露醬，仲用埋松露油嚟炒，難怪啖啖濃郁香味。牛角包亦非常鬆軟，牛油味再重啲更完美。
 

鐘意牛油果嘅朋友仔唔好錯過佢地嘅牛油果炒蛋多士，兩塊微脆煙韌嘅多士上面放滿切片牛油果同炒蛋。Creamy嘅牛油果同炒蛋固然合拍，蕃茄粒同火龍果粒唔單止係點綴，一齊食味道更加清新，係一份賣相呃到Like，味道同樣值得畀Like嘅輕食。
 

Lunch Set以意粉為主，蕃茄泡菜肉丸意粉味道以泡菜嘅酸辣為主，非常醒神。意粉醬汁分量同濃稠度都適中，足夠撈完成碟意粉，加埋五粒肉丸，相信男士都會夠飽。
 

飲品方面亦有用心，富士山特調睇起嚟真係有啲似迷你版嘅富士山，其實係用咗藍色糖漿、荔枝糖漿再加梳打水，最後加上奶泡。因為奶泡會慢慢下沉，所以相機飲先嘅朋友仔記得動作要快啲啦。飲落味道似加咗荔枝味嘅忌廉梳打。
 

除咗各款梳打，Cafe當然唔少得咖啡同Latte啦，紫薯鮮奶嘅紫色同樣係少女們最愛，飲落味道略甜，不過紫薯味道尚算自然。凍飲夠消暑，熱飲就有拉花圖案。
 

唔怕熱嘅話，另一熱飲推介係色彩繽紛嘅棉花糖朱古力，朱古力香味濃郁，而且唔會太甜，所以Selfie之後大可放心將所有棉花糖嚟搞勻享用喔。
 

Cafe座位唔多，而最特別嘅係有兩Set粉紅枱櫈，想坐嘅話建議先打電話同店主預約。不過其實店裡面仲有唔少角落都有裝飾，打卡位數唔到咁多。可以畀大家聽住K-Pop傾下計，瘋狂影相同時仲有得醫肚，值得鐘意蒲Cafe影相嘅各位Bookmark「收藏」！
 

花說 Fara xoxo
地址：長沙灣福榮街565號地舖

文、相：Cathy