夏日就係食榴槤嘅季節！有唔少酒店餐廳都乘勢推出榴槤主題嘅美食，好似馬來西亞榴槤節、榴槤主題下午茶自助餐及蛋糕等，榴槤控等咗成年，唔好再等喇，快啲bookmark同訂座啦～

目錄

馬來西亞榴槤節 唯港薈

馬來西亞榴槤節已經成為尖沙咀呢間酒店嘅傳統，一連12場活動將會喺8-9月舉行，包括自助早午餐及自助晚餐，每位客人均可享一份有五款不同品種榴槤嘅果肉拼盤，貓山王花雪蓮子烏雞燉鱈魚膠湯及D101榴槤鮑粒焗釀海螺，前者以滋補烏雞熬製超過三小時，加入鱈魚膠以及貓山王榴槤，連滋潤嘅榴槤殼同榴槤核一同熬製，味道清甜且香氣四溢。自助餐都有多款榴槤菜式，如香辣榴槤巴丁魚、榴槤桂花水晶雞、榴槤金錢袋、榴槤咖啡骨及榴槤海鮮腐皮卷等，款款味道都比想像中夾呀。

供應時間: 
2023年8月6日（自助早午餐及晚餐） 
2023年8月12日（自助早午餐及晚餐） 
2023年8月13日（自助早午餐） 
2023年8月27日（自助早午餐及晚餐） 
2023年9月3日（自助晚餐） 
2023年9月10日（自助早午餐及晚餐） 
2023年9月17日（自助早午餐） 
2023年9月24日（自助晚餐）

「榴槤盛薈」週末下午茶自助餐 大灣咖啡廳  

呢個榴槤下午茶自助餐嘅食物就充滿各地特色，包括充滿香港風味嘅D101榴槤西多士、炸D24榴槤波、特色榴槤披薩、榴槤越式米紙卷及雜錦榴槤壽司卷。甜品方面都好吸引，如榴槤巴斯克芝士蛋糕，榴槤同芝士嘅香氣互相揮映，平衡得啱啱好。另外仲有榴槤歌劇蛋糕同榴槤提拉米蘇等。餐廳會根據貨源情況選用口味濃郁、帶回甘果香嘅D197 貓山皇、甜而不膩嘅D24蘇丹王、味道清甜嘅D101紅肉及果肉嫩滑嘅D888甘榜。

供應時間: 2023年7月8日至10月2日

「泰愛榴槤」下午茶自助餐 尚廚 

鍾意食泰國菜又鍾意食榴槤就啱晒！供應以泰國菜同榴槤為主題嘅下午茶自助餐，甜品選用新鮮金枕頭榴槤果肉，味道香甜，口感軟滑。包括榴槤椰果千層酥、榴槤芒果糯米飯、榴槤泡芙、榴槤班戟及榴槤芝士撻等。鹹點方面有泰式柚子沙律、去骨白雲鳳爪沙律、泰式酸辣海鮮沙律、泰式紅咖喱雞肉迷你熱狗包、泰式班蘭雞、泰式豬頸肉及泰式紅咖喱大蝦炒飯，一定會食到捧住個胃走～

供應時間: 2023年7月1日至9月30日，逢星期六、日及公眾假期

 D24 榴槤忌廉蛋糕 Three on Canton 

呢間餐廳推出全新D24榴槤忌廉蛋糕，蛋糕造型十足十榴槤咁，啱晒打卡！嚴選馬來西亞頂級D24榴槤肉，夾雜鬆軟濕潤嘅海綿蛋糕及柔滑鮮忌廉，一入口榴槤嘅香氣同蛋糕嘅蛋香加埋忌廉融合埋一齊，每一啖都為味蕾帶嚟享受。

「榴槤狂熱」週末下午茶自助餐 Café Circles  

同樣啱晒大胃王嘅下午茶自助餐，甜品包括經典嘅榴槤班蘭蛋糕、榴槤焦糖燉蛋、榴槤奶凍、香甜軟糯嘅榴槤糯米糍及榴槤朱古力撻，特別推介榴槤焦糖燉蛋，食得出絲絲榴槤肉，味道都好濃郁。榴槤糯米糍唔太甜，口感軟糯，餡料飽滿。鹹點方面都好吸引㗎，如鮮花荔枝蝦果凍、西瓜菲達芝士沙律、碗仔趐、各式串燒、沙嗲、咸蛋黄炸雞同迷你牛肉漢堡等～

供應時間: 即日起至另行通知

文: Yanica
編：Kar