各位車迷或者有個鍾意車嘅男朋友或老公，中環嘅平治概念店Mercedes me就係開餐最佳地點！原本位於娛樂行，最近搬到去隔離萬年大廈，行多兩步就到新址。舖頭全面革新，由餐牌食物到格局都完全唔同，最近仲新推出brunch，都幾豐富吓！
概念店格局有家嘅感覺，一入去就係「車房」，有成架黑魂Benz G Class喺度，可以近距離欣賞，車款成日轉換架！另一邊就係商店，售賣各式平治精品。餐廳，設有有梳化同茶几、咖啡吧及用餐區。樓上就係開放式廚房及餐枱，當然如果我屋企蝸居有成兩層咁大就好喇。
以前餐廳以西班牙菜為主，菜式似tapas細細碟。新店就改以fusion菜式做主打，將歐陸菜crossover亞洲元素，由主廚Joaquin Elizondo操刀。部份菜式有品牌發源地德國風味，好似Pretzel、野菌配啤酒麵包及德式酸忌廉醬，亦有海膽配溏心蛋、鮟鱇魚配泰式醬汁及昆布等。
黑松露野菌意大利雲吞（$280）配上日式醬油汁及栗子碎，食落有點似餃子，卻有濃郁菌香。
香烤油炸鮟鱇魚（$320）配上椰汁、青檸製成的醬汁，配上加入蒜頭及乾葱製成的昆布蓉，帶點泰式風味。
加入牛油炒香的雜菌，配上微酸的德式醬汁泡沫，中和油膩感。
更多新店直擊： |
餐廳由早上開始營業至深夜，午晚餐外，亦可以食早餐、飲咖啡甚至happy hour。最近新推出埋周末早午餐，brunch餐牌幾吸引。先送上一系列頭盤，包括時令水果、生牛肉片、沙律同麵包。
時令水果盤非常吸引，有熱情果、荔枝等當造水果，刺激食慾！
主菜五選一，可以揀炭燒澳洲腹肉牛扒配太陽蛋及牛油果、烤三文魚配炒蛋、牛油果多士或鬆軟香蕉花生醬班戟。
甜品亦可三選一，士多啤梨開心果雪條造型得意，而且夠light，食完可以幫助消化呀。
食brunch點少得酒呢？可以揀相宜少少嘅C-Class任飲，或者有無限Perrier Jouet Grand Brut NV香檳嘅S-Class，每個Class都有紅、白同汽酒無限供應。週末早午餐供應時間為星期六12nn至3pm，星期日11am至3pm，每位$395，少少貴，勝在菜式靚環境靚，如果係Benz迷，更加應該要試！
地址：中環皇后大道中38-48號萬年大廈地下及1樓
文、相、片：Perrins