夏天為大地帶嚟咗好多嘢，包括榴槤！6月正值榴槤當造嘅季節，一眾榴槤迷係時候約埋一班臭味相投嘅朋友仔，四出覓食喇！
榴槤小籠包 樂天皇朝
圖：ytmxx
通常食上海菜，都好鍾意食小籠包，而呢間餐廳更加以八色小籠包聞名，又麻辣又芝士又黑松露咁都好創新，但最創新嘅一定係榴槤小籠包！一打開蒸爐，就聞到陣陣嘅榴槤香喇。皮薄煙韌，入面包住暖暖der榴槤蓉，果肉味濃。
榴槤雞煲 漁牧
圖：榴槤嘅可塑性都幾高下，混入做雞煲一樣得，得咗。呢煲榴槤雞煲，用嘅係金枕頭，連埋啲雞一齊放喺個煲入面，煲到咁上下，就慢慢開始聞到榴槤嘅香味，但唔算話好重味。榴槤同雞互相吸收精華，令到嚿榴槤嘅榴槤味相對較淡但就多咗一份雞嘅香味，至於啲雞，就有淡淡嘅榴槤甜味。
榴槤芝士pizza Sweetish by Honeymoon Dessert
圖：做開榴槤甜品嘅滿記，上年開多條young line，之後再推埋呢個榴槤芝士pizza。估佢唔到原來榴槤同芝士都幾夾，唔止隻色差唔多，一齊食都唔會話邊個搶咗邊個味。薄薄地嘅脆餅底，舖滿榴槤肉，再疊多層芝士喺面，清甜中多咗份鹹香，熱嗰陣仲有拉絲效果㗎。另外呢度嘅榴槤pancake榴槤刨冰等等，都可以一試。
榴槤白雪餅 榴蓮王
圖：呢間喺油麻地嘅小食店，睇個名就知道成間舖都係食榴槤嘢。榴槤pizza、榴槤pancake、榴槤心太軟、榴槤乜乜乜都有。其中，榴槤白雪餅更加係好多朋友仔嘅飛佛，即叫即做㗎。餅身係用日本米漿做嘅，煙煙韌韌，中間就係大大球嘅榴槤蓉，有得揀要D24定貓山王，暖暖der、甜甜der，好香，細味嘅仲食得出米味。芝士控仲可以試埋榴槤芝士凍餅。頂層係榴槤蓉，跟住係芝士同榴槤忌廉芝士，啖啖果肉入口，榴槤味同樣突出。
榴槤多士盒 Oslo
圖：為食女司機
位於九龍城嘅小店，主打特色飲品、手工甜點、輕食同All Day Breakfast，榴槤迷專誠入嚟，就係為咗佢嘅榴槤多士盒嘞。唔淨止得榴槤雪糕，連啲cream都係有榴槤味㗎，個樣又整得七彩繽紛咁幾靚仔，拮一粒多士仔搭一啖榴槤雪糕，都幾perfect池。
榴槤奶蓋 My Star Yogurt
圖：介紹咗咁多間嘢食，最後都講返間特飲吖。呢間喺旺角嘅舖頭，有雪糕有特飲。鍾意榴槤嘅朋友仔，可以試下佢嘅榴槤奶蓋，再鍾意嘅可以加配埋芝士，飲得到果肉之餘，亦有芝士嘅鹹香，口感幼滑。
文：Kar