天氣漸漸回暖，今個冬天非常短暫，但亦都代表住春日嚟到啦！隨住春天來臨，不少酒店都推出唔同主題嘅下午茶自助餐，例如有浪漫櫻花主題，又有清新抹茶主題，誓要以各款春意盎然嘅美食喚醒大家嘅味蕾。
Haagen Dazs任食 GREEN
喺萬物充滿生機嘅春天，各式水果都特別鮮甜。呢個tea set 以春日果漾為主題，提供一系列充滿果香嘅茶點，如紅桑子鵝肝、柑橘青檸乳酪蛋糕、罌粟籽檸檬蛋糕、紅桑子芝士朱古力等。
不過，最吸引嘅都係特別提供Häagen-Dazs™全新口味茉莉花紅桑子石榴同橙花雪糕杯及雪糕批，係無限任食㗎。凡惠顧呢個下午茶餐仲可獲贈Häagen-Dazs™單球雪糕券一張，三月同四月生日嘅食客，仲會收到禮物一份，超級大滿足啊。
春日果漾下午茶
日期： 即日起至4月30日
時間：星期一至五下午3時半至5時半；星期六、日及公眾假期下午3時至5時及5時至7時
價錢：每位港幣288元；兩位港幣546元 (另收加一服務費)
和風櫻花色彩 馬哥孛羅咖啡廳
將櫻花香氣融入美食之中，馬哥孛羅咖啡廳製作一系列精緻花藝甜點，一次過滿足食客味覺、視覺同嗅覺嘅三重享受。推介甜點包括櫻花乳酪芝士蛋糕、櫻花杏仁豆腐、櫻花士多啤梨卷、櫻花石榴慕斯蛋糕等。另外更有一系列充滿和風色彩甜點，如櫻花綠茶紅豆奶凍、櫻花清酒水晶糕、櫻花大福、三色花團子等，去唔到日本賞櫻嘅朋友，食返餐櫻花下午茶補數啦。
春日櫻花週末下午茶自助餐
日期：即日起逢星期六、日及公眾假期供應
時間：下午3時15分至5時15分
價錢：成人每位$298; 小童每位$198; 長者每位$248
抹茶魅惑 Promenade 西餐廳
呢個下午茶自助餐以抹茶甜品為主題，全部甜品均以日本京都宇治嘅抹茶粉製成，茶味濃郁、抹茶苦澀中帶有獨特甘甜。當中，抹茶千層班戟以多層抹茶班戟皮夾著幼滑忌廉，賣相同味道都非常吸引。抹茶天使蛋糕口感綿密，忌廉帶淡淡抹茶香，慢慢喺口腔中散發，甘甜可口。
抹茶白朱古力心太軟味道就最濃郁，而即時焗製嘅心太軟新鮮溫熱，白朱古力混合抹茶做成嘅香甜朱古力漿緩緩流出，蛋糕口感鬆軟，係幸福嘅感覺呀。
精選甜品仲包括抹茶紅豆卷同抹茶牛油蛋糕等，款款茶味突出，絕對滿足到各位抹茶控。
抹茶魅惑下午茶自助餐
日期：即日起至4月30日
時間：星期六、日及公眾假期下午3時30分至5時30分
價錢：成人每位＄$308; 小童每位$188 (另收加一服務費)
草莓「芝」味 2+2 café
草莓控萬勿錯過帝都酒店2+2 café呢個期間限定嘅草莓x芝士主題下午茶自助餐啦！超多款精美草莓芝士甜品陪大家開春日派對，包括草莓燕窩芝士蛋糕、草莓朱古力日式芝士蛋糕、半熟燕窩芝士撻及草莓芝士千層酥等，賣相精緻，少女心出晒嚟！
草莓燕窩芝士蛋糕濃郁香滑、入口即融，加上芳香手工草莓醬、原粒草莓同美顏燕窩，每啖都係幸福嘅味道。另外仲可以任食Mövenpick雪糕！！！就連飲品都係草莓——清香解渴嘅芝士奶蓋草莓茉莉花茶，夠晒甜咯。
草莓「芝」味甜品自助餐
日期︰即日起至4月30日
時間：星期一至日3時15分至5時
價目︰每位HK$158 (另收加一服務費)
創意櫻花甜鹹點 Uptop Bistro and Bar
菓子盒入面擺滿各款粉色鹹甜美點，有如櫻花盛放。呢個櫻花主題下午茶甜點款式多樣，包括迷你荔枝櫻花茶慕絲杯、日式蕨餅、北海道紅豆蛋糕、法式馬卡龍等。
鹹點方面就有多款創意日式料理，如日式櫻花蝦蟹肉沙律配綠茶蛋卷、櫻花蝦餅配蟹肉、鰻魚玉子燒等。另外加$52就可以享受埋櫻花氣泡酒，呢個櫻花盛宴就更加完美啦！
「春の桜」主題下午茶
日期：即日起供應
時間：星期一至日下午3時至5時
價錢：星期一至五 $368兩位、星期六、日及公眾假期 $408兩位 (另收加一服務費)
文、相：Kenna
文、相：Kenna