早排韓國過江龍百味堂喺尖沙咀開完pop-up store，好多食過嘅客人都話不捨，舖頭於是決定，正式進駐尖沙咀開店，更新增濟州抹茶系列甜品、咖啡，即刻睇相先！

你無睇錯，百味堂已經正式進駐尖沙咀呢個商場，唔再係pop-up store，而係畀客人歎啡歎雪糕嘅外賣店。嚟緊12月仲擴大舖位，畀客人買完雪糕可坐低慢慢影慢慢食添！

3款新口味！濟州抹茶系列

新系列所用嘅係濟州有機抹茶，無添加化學物質。初呷幾口味道不算濃，但茶味越飲越突出。濟州抹茶牛奶雪糕($78)將淡而甘香嘅濟州抹茶醬加入百味堂招牌牛奶雪糕之中，每一啖都有抹茶嘅餘韻，夾埋玄米粒一齊食，好滋味！

香甜嘅招牌牛奶雪糕，加上抹茶醬，絕對係perfect match！

玄米粒除咗脆口，都幾有米香架！

另一款濟州抹茶新鮮朱古力牛奶雪糕($82)，喺雪糕杯底照樣加入抹茶醬，但面層就改為加入朱古力醬以及朱古力碎裝飾，整杯雪糕有白有綠有啡，好colorful。

朱古力碎都幾多喎，味道雖然有少少苦，但配埋香甜嘅牛奶雪糕就啱啱好！

不過開飯仔最鍾意嘅並非雪糕，而係呢杯熱飲──濟州抹茶鮮奶咖啡($58)！咖啡豆混合咗埃塞俄比亞、印尼及哥倫比亞3個國家嘅咖啡豆，並喺韓國炒香再運抵香港，混合出嚟嘅咖啡飲落唔會偏酸、偏甜或偏苦，味道會較為balance啲。

喺咖啡未沖之前，先喺咖啡杯底將濟州抹茶、糖混和。

將咖啡豆製成咖啡粉，並將咖啡粉放入咖啡機中，等香濃咖啡出嚟，並倒入抹茶中。然後打起奶泡。

倒入牛奶，並將剩餘奶泡倒喺咖啡面，再灑上少許抹茶粉就完成。

聽落似乎簡單，但製作起來就殊不簡單，抹茶、牛奶、咖啡三者味道都好平衡，抹茶並未蓋過咖啡嘅微澀，口感綿密。

除咗濟州抹茶牛奶雪糕，濟州抹茶系列暫時只做到12月咋，因為12月又將會推出期間限定嘅口味，仲有成3-4款咁多添。口味究竟係乜？暫時官方未有公布，各位要留意住開飯仔報導喇！

百味堂
地址：尖沙咀河內道18號K11 B101A店

文：Joy