各位芋圓控有好消息！呢間主打手工芋圓嘅甜品店最近喺觀塘另覓地方重開，同舊店一樣由一對90後情侶主理，每日新鮮製作芋圓、地瓜圓、紫薯圓、芋泥球、豆腐花等配料，無添加色素或防腐劑，而且可以自由搭配，可以一解大家對台灣甜品嘅相思之苦呀。
 

芋圓控日前喺觀塘一座工業大廈當中重開，暫時同樣剩係得外賣自取不設堂食。每日有約20款唔同嘅配料，部分仲係期間限定，例如新出嘅奶茶凍、好受歡迎嘅蜜芋頭等。自由配搭得，跟店主推介嘅五款Set亦得，得咗。
 

招牌自家製芋圓（$44）

五款Set當中最豐富嘅選擇，一碗有齊仙草凍、芋圓、地瓜圓、紫薯圓、寒天晶球、小丸子，同西米，可以配仙草汁、黑糖汁、椰汁、淡奶、冬瓜湯當中其中一款。
 

三色芋圓都軟糯彈牙，秘訣係煮好後會用冰嚟過冷河，大粒飽滿又有咬口，同時食得出三種唔同食材嘅味道，當中以芋頭香味最突出。再配搭仙草凍嘅滑溜、寒天晶球嘅爽口、小丸子嘅煙韌，口感好豐富！
 

自選DIY（$34-46）

想自由度大啲，就可以揀自選DIY任揀心水配料，按配料數量收費。開飯仔呢份就有奶茶凍、芋泥球、粉圓、小丸子、芋圓、地瓜圓、紫薯圓配淡奶。奶茶凍係店主最近研發嘅新品之一，口感軟滑，微甜帶紅茶香。配埋黑糖粉圓同淡奶，真係幾有珍珠奶茶Feel。
 

芋泥球用芋頭加糖、牛奶等打成，唔係完全打成泥而係保留少少顆粒感，食落芋頭味道濃郁。小丸子就有微微糯米香，細細聲講多句，鍾意嘅話生嘅小丸子同三色芋圓都有盒裝可以早一日訂㗎。
 

 

黑糖粉圓鮮奶（$25）

除咗芋圓甜品，呢度仲有水果梳打同黑糖粉圓鮮奶。黑糖粉圓同樣每日熬煮，配搭凍嘅明治4.3特濃牛奶，口感外軟內Q。粉圓夠入味所以會越咬越香，而黑糖味唔會太甜，雖然黑糖香無台灣過江龍嘅咁鮮明，但呢個價錢嚟計真係好抵飲。
 

芋圓控
地址：觀塘駿業里6號富利工業大廈11樓C室
*只有外賣，不設堂食

文：Cathy
相、片：Calvin Kwok