沙田呢間超大型超巿內部裝修咗幾個月之後，今日終於重開喇，地方仲大咗添，有成2萬8千呎。除咗有各類乾貨、零食等售賣之外，仲多咗即點即食嘅立食專區，海鮮、牛肉都有得食。成日話沙田冇乜嘢食嘅朋友仔，以後多多個選擇喇。

牛肉類

一口牛肉串

立食、掃街梗係一串串咁食方便~ 串食唔再係魚蛋燒賣嘅專利，連牛肉都得。呢串牛，有3粒，分別係橫城韓牛、日本山形和牛同美國乾藏熟成牛，順返次序，由最淡食到最濃味嘅就啱晒。

特製威士忌、黑松露熟成牛

呢兩隻牛幾得意，唔使點醬，就咁食都食到由嚿肉度散發出嚟嘅黑松露香味，典解嘅？原來喺進行乾藏熟成嗰陣，已經加入黑松露油入去喇。威士忌味都係同樣原理，不過酒味就相對淡咗少少，要細嚐先食得出。

咁多牛，想買啲返去打邊爐都好正常吖。呢度有啲專為打邊爐而設嘅肥牛，A5級牛肩肉嚟。另外，喺牛肉櫃如果見到個牌隔籬有頂廚師帽嘅，就代表呢隻牛，可以請大廚即時幫你烹調埋添！廚藝平平嘅朋友仔，唔使驚浪費咗隻牛呀科科。

海鮮類

即燒活龍蝦、白酒煮藍青口

海鮮控嚟到呢區應該好開心，龍蝦、青口、生蠔、蜆……呢隻燒龍蝦，係加拿大大西洋嘅龍蝦嚟，鉗特別大同多肉，肉質鮮甜，落埋少少檸檬汁鮮味更出；而藍青口就係法國嘅，size比較細隻，但就好甜好嫩。

生蠔

成檔都係生蠔，日本、美國、法國等嘅都有。即開即食當然冇問題，仲有新食法添！生蠔on top再加三文魚子同海膽或者魚子醬，一個字，嘆！

再介紹大家一種新食法：罐罐燒。將生蠔或者其他海鮮放咗入專用盒入面之後，可以加入100mL嘅清水、白酒或者清酒，蓋返埋個蓋，以流動氣體爐或家居氣體爐嘅中火加熱8分鐘，貝殼類開咗口就食得，成件事幾方便，同埋即使喺屋企都可以好有日本feel~

酒水、甜品類

SO COCO鮮果椰子布甸Super Bowl

之前喺其他展覽、巿集都可能試過嘅素食甜品SO COCO，利用佢哋嘅人氣布甸產品，新創咗鮮果椰子布甸Super Bowl！有三款口味揀：芒果熱情果、菠蘿芒果熱情果（配椰子布甸）同無花果藍莓（配朱古力布甸），每款都會加埋健康產品有機奇亞籽同椰子脆脆，一啖幾種口感同味道，好豐富，邊行邊食都幾爽。

RF1 Juice Bar

呢間果汁店，除咗有一系列嘅日式沙律，仲有4款新鮮生果汁。其中mixed嗰隻就最抵喇，有成19種蔬果同殼物，包括羽衣甘藍、紅椰菜、甘筍、菠蘿、蘋果等等，攪出嚟係草綠色，無論望落定飲落都有種小清新。另外芒果、雜莓等果汁都好清甜，全部係用新鮮生果製呀。鍾意加冰又得，走冰又得。

門神 x city’super「沙田友」啤酒

飲開手工啤嘅朋友，實聽過門神呢個牌子啦。佢哋耐唔耐都會出啲新口味，今次仲特登聯乘超巿出咗隻「沙田友」啤酒，仲要食晒字，用「金柚」果肉同果皮釀造！味道酸酸甜甜，不過數量唔多，酒鬼要入貨就快手。

詳情
City'super
地址：沙田新城巿廣場一期二樓204-214號舖

文、相：Kar