旺角有大量樓上café，不過去到油麻地就唔多，喺廟街附近竟然有一間小小café隱身於酒店內，一入到去見到成幅木格仔牆身，加埋綠色植物，雖然面積唔大但樓底夠高，好似走咗去世外桃源咁！
Café叫做慢理牆城，負責人Johnny想大家可以放慢腳步休息吓。點解個設計咁特別？原來係無心插柳。Johnny解說：「全店用德國環保木堆砌而成，將我同設計師想做嘅擺埋一齊，本來打算搬一棵真樹入舖，但因為太難實行，於是乎用木條疊起代替。而木橋就係設計師嘅idea，一格格木箱放滿特色擺設，感覺homey，都係經朋友搜羅返嚟。」
餐廳食物款式唔算多，但質素都唔錯。最特別係甜品同飲品，櫻花樹下的忽發奇想 ($128)，「櫻花樹」係水蜜桃味棉花糖，配上自家製合桃朱古力brownie，寫埋字慶祝生日就一流。
另一款特色甜品係係威爾森與他的朋友圈 ($118)，係《劫後餘生》入面嘅排球Wilson，其實係來自意大利嘅椰子雪葩。最特別係個沙灘背景，用消化餅碎做沙，青檸啫喱做海洋。同一時間仲會送埋鮮果、熊仔糖等，俾你任砌DIY，有得食有得玩。
Come芒，占士 ($88) 係飲品嚟，用菲律賓芒果加牛奶打成，將芒果牛奶倒入用火槍輕燒過奶蓋，就會慢慢升起，而且有三層效果，相機要ready喇。
鹹食方面主要為小食、意粉及意大利飯同主菜，約有二十幾款選擇。意粉用顏色區分，有淺綠色牛油果忌廉蟹肉意大利飯、紫紅色嘅紅菜頭意大利飯、紫色紫薯野菜意大利飯等。
牛油果忌廉蟹肉意大利飯 $168
意粉可以揀龍蝦汁海鮮扁意粉 ($178)，以龍蝦頭熬湯煮成，加埋大虎蝦、智利藍青口、日本刺身級帶子等，都幾豐富。
小食要試芝士焗黑松露薯蓉大啡菇 ($98)，美國大啡菇上面舖上黑松露薯蓉，加上車打及Jack芝士焗成，香口又有濃郁菌味。
舖頭只得40個位，暫時人流唔太多，可以舒舒服服慢慢嘆。
地址：油麻地砵蘭街28號M1酒店1樓
文、相、片：Perrins
