自從海底撈宣佈來港開店後就再無新消息，我哋呢班火鍋迷等到頸都長埋！與此同時，銅鑼灣近日有 3 間新開麻辣火鍋店，間間都好似蓄勢待發，準備好迎接海底撈呢個勁敵！好，就等開飯仔點評一下呢 3 間麻辣火鍋店先！
「辣」名遠播 蜀大俠
2015 年於四川成都起家，發展只有兩年，卻於全國有超過 200 間店，遠至意大利米蘭都有，可見實力超強！餐廳非常受國內外明星嘅追捧，有范冰冰、張鈞甯、吳亦凡、趙麗穎等，亦多次成為國內節目的拍攝場地，就連電影《擺渡人》慶功宴上都指定食蜀大俠麻辣火鍋，Eason、偉仔都讚不絕口。
麻辣湯底用咗米酒、薑蓉、紅太陽、辣椒、青椒、牛油 10 幾款材料而熬成，分微辣、中辣、特辣 3 種程度；至於白湯，就用牛骨、豬骨、蔬菜、菇類熬出什菌蕃茄豬骨清湯。
圖：食材方面有近 70 款選擇，肉類、海鮮、丸類、蔬菜樣樣齊，而且餐廳深知我哋愛影相，喺食物賣相花咗不少心思。連餐牌都被設計成武功秘笈咁款，好得意。
(左) 冰川鵝腸、(右) 大俠上上簽 (牛肉) 圖：蘇怡Zoe、wander2wonder
(上) 太極雙滑，原味與辣味兩款。(下) 大俠水牛毛肚，即係牛柏葉。 圖：蘇怡Zoe、sharzi
(上) 功夫土豆片；(下) 必試「花千骨」，大廚將豬肋骨去骨後，加入秘製麻辣醃醬醃至 4-5 小時。圖：wander2wonder
陳柏宇加持 雲長小龍坎老火鍋
開店靈感取自國內小龍坎老火鍋──國內另一間麻辣火鍋店，於 2014 年四川成都起家，全國至今約有 300 間分店，背景與蜀大俠都幾相似。不同嘅是，餐廳有陳柏宇、模特兒趙勁皓投資，並且更推出香港獨有嘅菜式添！
圖：ckw720 @IG
麻辣湯底分大、中、小 3 種辣度，並由成都直送到港，再配以花椒、乾椒、麻籽等 10 幾種材料，當中最特別嘅就係湯底用牛脂肪去熬製，牛油味甚香，令湯底更濃郁。
圖：Ism1115
麻辣湯底之餘，仲有由香港師傅設計嘅蕃茄、藥膳湯底，藥膳湯料有龍眼、淮山、杞子等，好溫和。兩款湯底均可加入紅油或走辣。至於必食 items 有：牛柏葉、冰川鵝腸、小龍黃喉、巴蜀麻辣牛肉等等。
圖：jokerher @IG、Ism1115
香港店更有特別菜式：龍廚八寶摩天輪，影相一流。每個摩天輪上面都擺放餃子及丸子，如墨魚肉、牛丸、雲吞等，由師傅新鮮手打，口感非常彈牙。
店內仲有火鍋專用油碟，即麻油，加入蔥粒、蒜蓉蘸火鍋食材，可有助建降溫、解辣，亦令食物更香滑。
有「鮮」氣 臥龍正宗成都麻辣火鍋
呢間餐廳雖然並非出自內地餐廳，但湯底、湯料都均來自四川成都麻辣火鍋店，味道同樣正宗。店舖佔地約 2,000 呎，空間感十足，加上中國風裝潢，食客都坐得舒適。
麻辣湯料由成都直送，有花椒、青椒、紅椒、乾椒等等，設辣、超辣 2 種辣度，香港人一般選「辣」就已經啱食。鴛鴦湯底仲有用豬骨、雞骨熬成的白湯。
圖：肉類、海鮮、蔬菜大部分食材都購自本地街市，而且貨量日日清，保證新鮮。而且店中更有個小檔位畀師傅即場手切牛肉。另有自家製手打一品蝦丸、墨魚丸、牛丸、即炸響鈴、炸魚皮、雲吞、韭菜餃等等。
圖：
圖：文：Joy