唔少人去Cafe係想畀個空間自己Relax下，深水埗呢間咖啡店就絕對做到呢點，新店以身心靈健康為主題，希望以大自然嘅力量幫大家放鬆，樓底高加上唔少植物擺設，特別舒適。咖啡、食物亦有水準，特別推介佢哋嘅花茶，自家調配有助平靜舒緩！
 

一草一木位於深水埗基隆街，門口位同裡面嘅月球吊燈都係打卡位。店名一草一木係指聖木同鼠尾草，因為其中一位店主有研究占星同塔羅，會用到聖木同鼠尾草嘅煙去淨化空間同心靈。所以唔單止Cafe一角會有塔羅牌、水晶燈，更會燃點鼠尾草，同播放大自然輕音樂，感覺舒服恬靜。
 

The Soulroom Present：無常（$68）

即係黑芝麻蛋糕，店主特別搵相熟甜點師設計，用唔同比較嘅忌廉加上黑芝麻營造六層嘅漸層效果，賣相吸引。白色部分有忌廉嘅奶香，黑色就有濃郁芝麻香氣，一齊食味道平衡而且甜度啱啱好，最底嘅芝麻脆脆有齊黑芝麻同白芝麻，增添香氣同口感層次。
 

Scone（Earl Grey）（$35）

英式鬆餅以月牙形狀嘅碟奉上，配搭果醬同Clotted Cream，外酥脆內鬆化。而且無論聞起嚟定食落都帶伯爵茶獨特嘅佛手柑香氣，配茶一流。
 

Scone（Onion）（$35）

鬆餅更有坊間較少見嘅鹹食口味，裡面有半融芝士同爽脆洋蔥粒，洋蔥嘅辛辣中和芝士嘅膩度。而且翻熱後香氣濃郁，值得一試！
 

Ham & Cheese Bagel（$55）

貝果有煙三文魚同芝士火腿兩款口味選擇，貝果口感煙韌軟彈，配埋芝士同火腿成個組合真係無得輸。夾埋火箭菜喺裡面，一個人食完成份都唔會覺得膩。
 

 

Latte（$40/熱，$45/凍）

咖啡豆有兩款選擇，House Blend係巴西日曬同薩爾瓦多水洗嘅拼配，偏Nutty風味，一開始會飲到榛子、焦糖嘅香氣，後段帶車厘子同黑朱古力風味。而開飯仔試嘅呢杯係用另一款SOE豆，屬於埃塞俄比亞嘅日曬，偏Fruity風味，聞落帶優雅嘅花香，初段熱帶水果嘅酸甜味道突出，後韻係柑橘風味。
 

一草一木特調（$60）

佢哋嘅花茶亦有唔同選擇，呢壺同餐廳同名嘅係店主嘅特調，選用檸檬馬鞭草、馬鬱蘭葉、洋甘菊調配而成。馬鞭草對副交感神經系統有調節同安撫嘅作用，可以平緩情緒，馬鬱蘭葉喺芳療上有助舒解焦慮、鎮靜助眠嘅功效，洋甘菊亦有安神助眠嘅作用。味道以洋甘菊嘅甜味為主，加上花香非常易入口。
 

小店更有Lab Aura寄賣嘅咖啡豆，最新以人馬座為主題嘅咖啡豆嚟自巴布亞新畿內亞，帶紅酒風味

每杯飲品都會附上小卡片

一草一木
地址：深水埗基隆街102號

文、相：Cathy