深水埗不嬲都多價錢唔高又有特色嘅美食，例如呢間新開、主打正宗福建小食同麵食嘅小店。古法扁肉人手每日包製，石磨腸粉即叫即蒸，仲有藥膳湯麵幫各位繁忙嘅打工仔女補補身，相當有心思。
 

五福園位於深水埗北河街，雖然係新開張但已經有一批街坊熟客，皆因唔少食物都係落足材料兼自家製。好似燕皮扁肉就係莆田傳統手工菜，燕皮係用手打豬前腿肉加入糯米粉，再壓成一塊塊。燕皮比一般用麵粉做嘅雲吞或者餃子皮更香更彈牙，而且浸耐少少都唔會發漲。
 

福州燕皮扁肉（$38/13隻，$42/20隻）

扁肉裡面係新鮮豬肉餡，只係加蔥提鮮已經夠香。而燕皮食落口感煙韌，有啲似魚皮餃但比魚皮餃滑溜，細細粒但都幾飽肚。而湯底係店家用大量豬骨同豬肉熬製嘅豬骨湯。
 

新鮮雞蛋腸粉（$18）

蝦仁腸粉（$25）

石磨腸粉亦有水準，雖然未到港式「玻璃腸粉」咁透，但都相當薄身，可以見到裡面嘅配料。食落有米香而且口感夠滑。秘訣原來係用福建一種專做腸粉嘅米，浸過一晚再每日磨漿，加上即叫即蒸，熱辣辣無論加咩配料都咁夾。
 

 

家雞罐罐麵（$48）

除咗小食，想飽肚啲嘅話可以揀佢地嘅罐罐麵，一罐罐咁上枱，裡面係藥膳湯麵！湯底用豬骨湯加上多款中藥，例如補氣嘅紅棗、杞子，補益肝腎嘅蟲草花，再加提鮮嘅冬菇等熬煮而成，食落藥材味唔算好濃，味道帶甜，對小朋友嚟講都會易入口。麵條口感滑溜，不過浸得太耐會變腍啊留意返。
 

五福園
地址：深水埗北河街131號地舖

文、相、片：Cathy