想喺中環鬧市當中靜落嚟享受一杯茶，而家絕對無問題！呢間嚟自澳門嘅茶室開到嚟香港，首店係位於中環嘅旗艦店，主打多款日本、中國茶，部分仲係同當地茶農獨家合作。除咗手沖茶，唔少茶點都好吸引，首推茶漬飯同特濃抹茶雪糕！
汴京茶寮中環旗艦店佔地約2000呎，感覺簡約明淨，夜晚8點後仲會換上榻榻米茶座，好有去咗日本嘅感覺呀。手沖茶飲由茶師即點即沖，泡茶用嘅水用美國濾芯過濾，水溫、沖泡時間等都有講究。熱茶會附上茶隔同茶葉，可以喺店或者返屋企自己回沖。
八女冠茶（$58/熱，$62/凍）
同日本福岡八女市茶農獨家合作嘅一款茶，冠茶嘅意思即係採摘前遮光一段時間，令茶葉減少苦澀味而增加鮮甜味。的確打開蓋就咁聞茶葉，就已經有一陣類似抹茶獨特嘅「Umami」鮮味，而且茶湯顏色特別青翠。味道清香富層次感，回甘較淡但非常悠長，最後帶一絲生津嘅感覺。紙杯方便大家Grab & Go，上面仲印上詩句。
桂花四季春烏龍（$50/熱，$54/凍）
凍茶會先以冰鎮降溫，飲品裡面唔會有冰就唔怕沖淡茶香。用桂花乾配搭台灣高山四季春烏龍茶葉，就算係凍飲，桂花香氣依然濃郁。茶香甘醇帶微甜，口感清爽順喉。
Lunch Set C（茶漬飯+是日配菜兩款+茶凍+手沖茶）（$158）
香港店新出嘅茶漬飯套餐，茶漬飯嘅湯係用鰹魚湯同日本靜岡玄米茶調製，有高菜櫻花蝦、高菜白魚、雞肉碎，同三文魚碎四款選擇。茶漬飯調味得宜，既食到配料味道又唔會完全蓋過茶香。
另一值得一讃嘅係套餐當中嘅茶凍，食落爽口清甜，滿足到甜品胃又唔膩，有桂花等唔同口味。套餐包一杯熱嘅手沖宇治煎茶或小白龍珠茶，後者加入茉莉，同樣味道清香。
更多【新店直擊】： |
特濃抹茶雪糕（$54）
澳門人氣茶點之一，用咗幾款唔同嘅抹茶，雪糕茶香非常濃郁，回甘亦相當突出，同時亦食到牛奶味。不過冰感比較重，口感似抹茶碎冰多過雪糕。
日本手造上和菓子（$58）
由日本和菓子職人手工製作，全部造型都非常精緻，裡面係紅豆餡，味道微甜最啱配茶享用。
汴京茶寮
地址：中環雲咸街36-38號雲慶樓地舖
文：Cathy
相、片：Tom Li