仲以為芫茜熱潮已退，點知原來芫茜熱真係咁強勁，連灣仔呢間新開嘅港式小食店都要玩埋一份，推出芫茜味章魚燒！除此之外，舖頭仲特設特大螢幕畀客人自助落單，柯打各款車仔麵。咁新，開飯仔當然去潮拜一下！

店子主打兩款食物：章魚燒、車仔麵。介紹番章魚燒先，同平時食開嘅日式章魚燒做法相若。先將粉漿倒入丸子模中，再陸續加入章魚、生菜等配料，半熟時翻轉丸子。最後將小丸子上盒，唧上惹味燒汁，再加入客人揀選嘅醬料。

必食之選當然係芫茜章魚燒啦，除咗面層有好多芫茜之外，仲特別加入芫茜醬，令芫茜味更香更濃，絕對係必食item！除咗芫茜章魚燒外，另有原味、芥辣、香蔥芝麻、勁爆蟹子、韓式泡菜及泰式冬蔭公6款口味，都幾特別喎！

另一款主打嘅車仔麵，食物上同平時嘅分別不大，不過呢度就多咗部供客人自助落單嘅特大螢幕！

客人只需點選螢幕上心水嘅車仔麵麵類、麵量、醬汁及配料，傳送後店員亦同時接收到柯打，並會開始製作車仔麵，客人只需靜候片刻就有食物喇！

不過新店系統尚未整好，所以客人暫時落單後仍需要將柯打紙遞畀店員架！

店員先淥麵晾乾，再加入心水配料，開飯仔就揀咗牛腩、蘿蔔及豬大腸。

然後將晾乾嘅麵條倒入碗中，並加入豬骨清湯，然後加入客人所選嘅醬料如冬蔭功、牛腩汁、辣汁等等。開飯仔揀咗用番茄、檸檬葉、青檸、香茅等配料而成嘅冬蔭功汁，味道比一般嘅偏酸，不太辣，幾開胃。

用豬骨熬咗幾個鐘頭嘅湯底顏色偏深，但味道好清，而且不加味精，飲完唔會口渴。

麵條都煮得幾腍，亦幾吸湯。而牛腩分量比想像中多，軟腍得嚟又有啲嚼頭。

開飯仔最鍾意就係蘿蔔，夠入味，而且無渣，正。

不過留意番，舖頭不設座位，客人只可買走。

口渴有咩飲？除咗有bless招牌冷壓果汁，仲有舖頭自家製薄檸冰，用薄荷葉、冷壓檸檬汁等製成。

食字號
地址: 灣仔交加里51號保和大廈地下J2號舖

文、相、片：Joy