今日食泰國菜，日本菜，定韓國嘢好呢？諗嚟諗去都係呢幾樣，不如搞搞新意思，試下取材自地中海嘅燒烤大餐啦！灣仔呢間特色餐廳主打煙燻同燒烤菜式，店裡面仲有2米高燒烤架炮製烤肉，超有架勢。
呢度大部份菜式都經過煙燻處理。招牌菜煙燻鴨以北京烤鴨作為靈感，用嚟自中國嘅六至八星期大嘅鴨，肉質嫰滑，油脂較多。鴨肉以茴香粉同石榴糖漿醃製，然後煙燻、烘烤，再炸到酥脆。煙燻鴨口感香脆，帶煙燻香，肉質軟嫩。
跟住呢道鰤魚刺身外層包住烤成焦黑色嘅韭菜炭碎，切片後配上香烤牛油果同茴香。入口可以品嚐到魚肉嘅甜味同炭碎燻香。
再介紹多道海鮮菜式畀大家。呢道菜式選用澳洲青口，以香醋醃製，經冷燻處理後，配埋醃料、白葡萄酒通青口汁上碟。冷燻令青口保持甜美多汁，配埋白酒，入口鮮味突出。
鍾意食肉嘅朋友就可以試下呢道煙燻慢煮牛肉。選用經鹽同黑胡椒醃製嘅美國牛肉，再以熱燻技術慢煮，肉質因而多汁，並帶有煙燻香味。
呢度嘅甜品都好特別，呢道焦糖慕絲蛋白餅以香甜軟滑焦糖慕絲，配用火槍燒至焦化嘅蛋白餅，面頭再灑上微燻過嘅麥芽同榛子碎，口感豐富，食落時香時苦幾得意。
介紹完多款佳餚，又點少得美酒呢。呢度有款雞尾酒叫Ashes to Ashes，用蘇格蘭威士忌、梅斯卡爾龍舌蘭、柑橘、活性碳同洛神花調製而成，味道酸甜濃郁。呢杯酒嘅製作過程華麗，調酒師會用火槍燃燒洛神花粉灑喺酒面，洛神花粉一經燃燒會變成火花，好適合影相打卡。
另一杯值得推介嘅雞尾酒叫My Butter Half，以鹽味金黃糖漿、苦酒同加入牛油嘅波本威士忌調配而成，配搭新穎，味道甘甜帶微微牛油香。調酒師將酒倒入杯時，會一邊擠橙皮汁令酒帶有甘澀橙香，製作用心細膩。
地址：灣仔船街9號頂旺大廈地下A舖
文、相：Kenna