每年嘅6至9月係白桃當造嘅時間，又大又甜又多汁，食多幾個都唔會嫌多。尖沙咀有間新開冇耐，細細間嘅冰菓屋，陸陸續續都會推出啲白桃嘅冰品，包括水蜜桃茶沙冰同埋山梨白桃刨冰！

現階段供應中嘅水蜜桃茶沙冰，先放三片薄切嘅桃肉喺側邊，然後斟入用水蜜桃果醬加白桃果汁再加紅茶去調製嘅沙冰，就咁飲都覺得好甜，果甜嗰隻甜，桃味同紅茶味做得幾平衡。但都未夠喎，仲要插多半個日本直送嘅山梨白桃喺杯邊，無論賣相定係味道都相當吸引。拎走外賣嘅話，條街應該都會有幾多人望住你……杯嘢。

而喺下個月（其實即係下個禮拜，9月1號）開始，就會推出埋一系列嘅果系刨冰，例如士多啤梨、藍莓、熱情果、山梨白桃同熱情果拼山梨白桃等。每款刨冰砌到高一高，再放上新鮮果肉，又係另一款IG呃like-able嘅嘢食。

刨冰分幾層製作，中間會分別淋上煉奶同相應嘅果醬，而且仲「刨冰冚珍珠」添，內有乾坤㗎，好似士多啤梨同藍莓嗰兩款呢，中間就會有件自家製嘅士多啤梨/藍莓奶酪。而白桃嗰款呢，就會有自家製嘅水信玄餅。水信玄餅入面都有桃肉㗎！完全係由內到外到內都畀白桃包圍呀，食落好香甜。

唔講唔知，刨冰用嘅冰都好有來頭㗎，係用日本嘅地下天然水製成，雜質含量較一般水少，清純啲，亦都相對上溶得慢些少。之但係唔好話開飯仔唔提醒你，而家天氣咁熱，都係叫你部相機食快啲啦。

氷川菓屋
地址：尖沙咀山林道10-12號山林閣地下2C號舖

文、相：Kar