真的假不了香港茶餐廳放題

香港傳統茶餐廳同日式放題好似大纜都扯唔埋，但喺香港呢個「創作力量同幻想會嚇你一跳」嘅地方無嘢係無可能嘅！放題一詞嚟自日文食べ放題（任食），香港嘅茶餐廳都可以任食？係，曾經係，而且前後仲有三間咁多！

肥嘟嘟茶餐廳（已結業）　$30任食

圖：kenntong & kaifan1002
香港地產霸權當道，唔少老闆話做埋都唔夠叫租，喺2013年3月就有呢間茶餐廳嘅老闆諗到茶餐廳放題呢條橋，諗住薄利多銷！平時叫個常餐都要差唔多$30，忽然「升呢」做任食的確係幾吸引，所以呢個消息一出就引嚟大家喺網上瘋傳，造成全城熱話。茶餐廳嘅生意額亦立刻暴增三至四倍。

不過最平$30嘅放題做咗兩個禮拜之後，就靜靜雞改做$40，加幅一下去到33.3%令唔少諗住去試嘅人卻步。而且試過嘅食客都話食物無乜特別，荃灣街坊亦直指茶餐廳衛生欠佳，老闆態度惡劣，一向都係口碑平平。生意不升反跌，最後喺15年年尾結業。

彩龍茶餐廰（已結業）　$58中西式自助餐

圖：nickname723 & choilunghk
香港人大概有種打不死嘅精神，一間茶餐廳結業之後有另一間茶餐廳再次勇於挑戰，做中西小菜自助餐！講緊嘅就係油麻地呢間舊年年底新開嘅茶餐廳，今年2016年1月開始夜晚6:30至10:00有任食自助餐，都係$58一位！中西小菜大概有十三款，選擇都OK多有一般正價茶記水準，菜色每晚都會換，加上白飯「任裝」。

唔少去食嘅都係夫婦或者中老年嘅街坊，咁的確用平民價做宣傳係最有效嘅。而且呢種酒店式自助餐嘅做法可以減低樓面同廚房嘅人手，拉上補下先不至蝕本。

香江冰室(已結業)　$80午市$128晚市放題

圖：klee0322 & ryangregorychan2
放題並唔係平價茶餐廳嘅專利，中環呢間復古新派冰室喺2015年12月新開張嘅時候亦搞放題嚟做宣傳。嘢食選擇中西都有，包括中式點心、沙律、焗飯、意粉、甜品，晚市仲有鐵板扒！立刻覺得容易回本啦。

不過唔少食客嘅意見都係無想象中咁出色，因為部分食物都幾容易「中伏」。幸好上菜速度夠快，而且服務態度唔錯，新餐廳環境感覺舒服，補返分數。